【網購自私買家】智能櫃淪垃圾崗遍地紙箱包裝 街坊斥自私：加重清潔工負擔

自新冠肺炎疫情襲港，不少市民改為網上購物，但方便的同時卻製造大量包裝垃圾。有美孚街坊日前發現，該區一個商場的順豐智能櫃附近，堆滿紙箱及包裝袋，相信是其他街坊即場拆貨及隨意丟棄所致，形容該處儼如垃圾崗，呼籲大家自行處理，勿再加重清潔工負擔。

近日有網民在Facebook群組「mei foo 美孚」發帖及上載照片，指美孚廣場的順豐智能櫃附近堆放大量紙箱及包裝袋，相信是附近街坊即場拆貨，然後隨手丟棄包裝，並謂「大家對呢個景象應該見怪不怪」。

事主續指，在疫情底下，明白每個人都想盡量避免帶紙箱回家，以免帶細菌入屋；他表示既然大家都已出街，回家後都要清潔雙手，「掂多陣個箱真係咁大問題？又唔係叫你攬住佢」，並謂：

「最低限度！可唔可以整平個箱先掉喺度，搞到垃圾崗咁。」

疫情下湧現缺德山友滿山垃圾 年邁清潔工揹大袋垃圾落山，詳情即睇：【下一頁】

事主又指，街坊隨手丟棄包裝，等同加重清潔工的負擔，「雖則話人工包，但唔少係外判，本身人工都唔高」；若大家都抱著「個個都咁掉喺度㗎啦」的心態，便會導致滿地垃圾，慨嘆：「你唔掉，我唔掉，呢堆嘢係唔會出現的」。

事主最後表示，除了上述的順豐智能櫃，間中亦見到平台各處有被棄置的電視機包裝箱、小傢俱等等，她呼籲大家應自行處理，

「各位掉嗰陣，可唔可以諗吓幫你執手尾嘅人？交咗管理費唔係大晒。」

帖文引起不少網民關注，紛紛留言批評有關行為相當缺德，「離晒譜」、「無公德心，低質素的人太多了」；亦有指有次去智能櫃取件時「要跨過好多個箱」，因而被包裝紙箱𠝹傷腳。另有人表示除了扔到垃圾房外，亦建議可按以下方式處理：

「平時掉去垃圾桶，都整平啲先；有玻璃就寫幾隻字提吓人，小心𠝹到。」

小夏威夷徑變外傭樂園淪垃圾崗 善心男不斷清理每次提2大袋落山，詳情即睇：【下一頁】

每朝索取《晴報》：精明生活．健康家庭．開心娛樂

撰文：賴天兒