香港迪士尼15周年 酒店和網店送出生日禮物

黛安考考大家，知唔知今個星期六（12日）係咩日子？係香港迪士尼15歲生日啊！雖然疫情下樂園需暫停開放，但當日米奇、米妮同一班迪士尼朋友會喺網上送上生日祝福，到時只要留意佢哋fb專頁嘅生日影片，留言答啱問題就有機會贏走禮物喇。

香港迪士尼15周年正日生日當日，香港迪士尼樂園酒店亦準備咗連串驚喜，凡當日入住酒店嘅賓客將可獲贈「15周年特別版襟章」，客房內亦會送上別緻嘅15周年房間毛巾小擺設、精美「生日歡迎曲奇」同「生日歡迎卡」等。當日去晶荷軒或翠樂庭餐廳用餐，每一枱亦會收到餐廳免費贈送嘅「15周年杯裝蛋糕」乙個，齊齊分享生日好滋味，好開心啊！