【做人態度更重要】Band 3學生滿意DSE成績 反被勢利親戚揶揄感自卑 母親一句話勉勵兒子感動網民

做事但求問心無愧，毋須與人比較！一名參與剛過去的DSE（中學文憑考試）的考生在網上分享，指自己Band 3學校出身，對在DSE中考獲17分感滿意，更形容成績出乎意料之外；惟其親戚仍揶揄他成績欠佳，甚至在聚會上當事主一家「透明」，令他倍感挫敗。事主母親得悉後暖心作出勉勵，指不介意兒子入讀大學與否，「只要對得住天地良心、爸爸媽媽」便可。

Facebook專頁「名校 Secrets」周二（1日）刊登一名男網民的投稿，他表示自己畢業於一間Band 3中文中學，為今年DSE考生。他形容，家人工作繁忙，從小到大都沒有監督他；加上他本身「自覺性低」，升中後基本上也是「人云亦云」，「跟住啲同學頹，終日無所事事」，以致學業成績不佳，

「我冇嗜好、冇興趣、冇目標，讀書都係好Hea（隨便）咁讀。考完DSE，自問大部分都唔識，打定輸數要讀Foundation Diploma（基礎文憑課程）。」

DSE考獲17分感意外：開心到癲

令事主感驚喜的是，其DSE終考獲5科Level 2，最佳6科成績合共17分；雖然成績仍未達報讀大學的門檻，惟他坦言「都幾震驚吓」，而他最終選擇報讀高級文憑課程，他形容：

「我喺我嗰間學校有呢個成績我已經開心到癲，屋企人都好Surprise（驚喜）我竟然唔使讀Foundation Diploma。DSE有呢個結果，對我呢種人來講好似已經好好彩。」

開Zoom同學家底見高下，公屋仔家嘈屋細感自卑︰被環境搞到冇心機讀書，詳情即睇：【下一頁】

勢利親戚揶揄成績差 聚會當「透明」

惟事主指，日前其親戚辦家庭聚會，形容對方「全部都係好有錢同好勢利嘅人」；儘管他們沒有當面揶揄他，卻不斷炫耀自己同為今年DSE考生的女兒「有幾多粒星星」。不過，事主指「知道自己有幾多斤兩」，且算是一個「睇得開嘅人」，因此從沒有羨慕或妒忌他人，

「加上好感恩我阿爸阿媽從來都唔會將我同人哋比較，就算我聽到啲窒我『垃圾』嘅說話我都盡量忍佢哋。」 

然而，事主指其親戚當晚竟把他們一家當「透明」，用餐或「打牌」也沒預他們份，其中一名親戚臨走前更向事主母親表示：

「一早叫你每個月Dum幾千蚊畀佢，補吓習就唔使咁啦 ，你（事主）呀，努力啲啦吓。」

事主聞言頓感錯愕，惟他指最讓他心痛的是其母的回應，當時母親表示：

「係囉......最衰我哋搵得少，畀唔到最好嘅學習環境佢......」

母親一句話勉勵感動網民

事主表示，他回家後即把自己反鎖在房內，隨後兩天也沒跟母親說話，形容自己「人生第一次咁自卑」，

「一方面覺得自己考唔入大學，令阿爸阿媽好無面；一方面Feel到上流嘅親戚都唾棄低學歷嘅我哋一家人，好無奈。的確，我冇上進心，又唔勤力。」

事主母親知道他為被親戚揶揄一事感不快後，便安慰他道：

「阿仔，你已經好叻，入唔入到大學，我哋真係唔介意，你已經叻過爸爸媽媽，就算你以後做啲咩、做得叻唔叻，只要對得住天地良心、爸爸媽媽。」

不少網民看到帖文後，紛大讚事主母親講得好，又留言為他打氣，「你媽媽唔嬲你之餘仲反過嚟安慰你，證明佢真係好愛你，愛你仲多過佢自己」、「只要你高級文憑課程讀得好，入大學絕對唔係夢！同埋你媽咪好謙厚，係明事理的好媽媽」、「做好自己、行好自己條路就得，唔使理其他人點講你㗎」。

屋邨出身被嘲「新界人衣着」，女生考入港大神科力爭上游：別太快向身邊的人下結論，詳情即睇：【下一頁】

文章內容獲Facebook專頁「名校 Secrets」授權刊登

每朝索取《晴報》：精明生活．健康家庭．開心娛樂

撰文：蘇麗儀