【國王的電視】小米推全球首款全透明電視$5X,XXX買返嚟點睇？抵唔抵？

最近股價屢創新高嘅小米（01810），早排為咗紀念公司成立十周年而研發嘅劃時代產品「小米透明電視」 ，8 月中已經喺內地開賣，盛惠49,999人仔，即係差唔多港紙55,000左右！其實部機貴在用咗全透明OLED面板，應該點睇好？

相信大家都會好奇，呢部5萬幾蚊嘅電視採用咩規格。官方資料顯示「小米透明電視」採用55吋、厚度僅5.7毫米透明OLED面板，標榜仲薄過小米手機，更支援10-bit 10.7億種色彩顯示、電影級DCI-P3色域、1ms電競級反應速度、MEMC運動補償（120Hz）及15,0000:1超高對比度等高端技術，單睇呢一堆數字就知好勁。不過咪住，好似唔覺有解像度資料嘅？可能因為透明面板係新技術啦，呢部「國王級」身價嘅電視，解像度竟然只有你同我間房入便部32吋電視咁，FHD即係全高清1920x1080解像度！

FHD都唔緊要，因為最值錢係嗰塊最新研發嘅透明OLED屏幕，企喺部電視前或後睇，都可以透視，當有畫面顯示就好似懸浮喺半空中咁樣，非常有型。但係部電視咁透明，會唔會好似「國王的新衣」咁，太過「See Through」，連後面都睇晒？有內地媒體同網紅就喺發布現場親身直擊，發現實際效果真係「乜都睇到」。

{{hket:inline-image name="0901WLfeaturepage550.jpg"}}{{/hket:inline-image}}

▲5.7mm超薄切面板之外，「小米透明電視」仲有圓餅形主機底座，內置2個8W揚聲器，支援杜比全景聲及DTS雙解碼。（來源：小米）

「小米透明電視」全透明OLED螢幕透光度係就係好高喇，但實際使用反而變成缺點。就咁睇，畫面顯示唔同顏色嗰陣都算鮮艷，但係唯獨黑色就全部會變成透明，令電視後面嘅牆身或者物件，全部都會睇到晒，如果後面好花，都幾難睇得清楚畫面。於是有網友就建議喺部機後面放一塊全黑背景板，咁就可以正常睇到畫面嘅細節。咦，咁咪同「太陽能電筒」有異曲同工之妙。如果用5萬幾蚊買部透明電視返嚟，後面仲要整塊全黑背景，咁不如買部普通電視好過啦！

{{hket:inline-image name="0901WLfeaturepage549.jpg"}}{{/hket:inline-image}}

▲「小米透明電視」顯示黑色會變成透明，後面景物都變「See Through」，實際使用需要環境配合。（來源：Eva的科技生活YouTube影片截圖）

所以話呢，凡係叫得「國王的XX」，都係用嚟Show Off。呢部「小米透明電視」都係技術展示成份居多，有錢買嘅人都係買返嚟Display多，因為佢賣相的確好有Cyber「未來感」，得閒開嚟俾朋友或者客戶開吓眼界就好，但真係用來平日睇電視，後面如果無塊深色背景都幾難用。

{{hket:inline-image name="0901WLfeaturepage548.jpg"}}{{/hket:inline-image}}

▲「小米透明電視」由小米創辦人雷軍親自發布。（來源：小米）

講到尾，究竟香港會唔會有得賣？小米電視由於兩地電視格式仲有啲問題，喺香港一向都只有水貨，加上以「小米透明電視」嘅身價同特殊體質，睇嚟水貨商都唔敢貿貿然入貨。

編輯：唐婉琦

接收全方位穩健財富管理資訊，請讚好「健康財富 Wealthy Life」Facebook：https://fb.com/Wealthylifehk/