【微電影頒獎禮】沈震軒入行13年勇奪男主角金獎 初入TVB要住劏房日子點捱過？

《第七屆微電影「創+作」支援計劃（音樂篇）》頒獎典禮暨得獎作品首映昨日於網上舉行，沈震軒憑主演嘅微電影《孽鏡台》奪得「最佳微電影男主角」金獎，佢接受《晴報》訪問時感激台前幕後：「大家好信我，鍾意我寫嘅微電影故仔，佢哋當初亦好幫到我手，收友情價。好可惜今年因為疫情問題，頒獎禮唔係實體，呢段時間亦冇得慶祝，好想同團隊出嚟食餐飯。」唔經唔覺，現年37歲嘅沈震軒原來已入行13年，風光背後，佢都曾經捱過一段艱苦日子。

{{hket:inline-image name="12.png"}}{{/hket:inline-image}}

(《孽鏡台》電影截圖)

{{hket:inline-image name="13.png"}}{{/hket:inline-image}}

(《孽鏡台》電影截圖)

沈震軒06年喺加拿大回港，加入TVB開展演員生涯，頭入行嗰幾年，底薪只有6000蚊。佢曾於訪問指自己住喺尖沙咀劏房，每月都要畀4000蚊租金，僅餘下2000蚊作為生活費。當時佢限住自己每日唔可以用多過50蚊，堅持每日由尖沙咀行到旺角，只為買一個價值20港元嘅特價飯盒。佢仲窮到連電視機都冇錢買，3年都冇睇過電視：「我唔係生於有錢家庭，住劏房得張床、衣櫃同洗手間，乜都冇。」可惜，努力付出未必有回報，加入TVB 8年嘅沈震軒一直只獲派做閒角，演過唔少次死屍、士兵，依然等唔到代表作，有次導演認唔出佢，仲以為佢係TVB喺出面借返嚟嘅演員。

{{hket:inline-image name="16.png"}}{{/hket:inline-image}}

(TVB電視截圖)

{{hket:inline-image name="17.png"}}{{/hket:inline-image}}

(TVB電視截圖)

2011年沈震軒喺《潛行狙擊》飾演何賜登（爆登）開始人氣急升，劇中留鬚造型令人留下深刻印象。後來沈震軒開始向外闖，13年被「金牌經理人」黃柏高睇中，開始歌視三線發展，拍過不少電影例如《喜愛夜蒲2》、《古惑仔：江湖新秩序》等作品，知名度大大提升，更有機會去大陸發展。14年，佢喺《使徒行者》飾演連浩勤（Kobe），戲份非常之重，形象又入屋，亦令佢人氣爆登。

{{hket:inline-image name="18.png"}}{{/hket:inline-image}}

(TVB電視截圖)

{{hket:inline-image name="14.png"}}{{/hket:inline-image}}

(《喜愛夜蒲2》電影截圖)

{{hket:inline-image name="15.png"}}{{/hket:inline-image}}

(《古惑仔：江湖新秩序》電影截圖)

依家沈震軒終於唔使再擔心生活，仲可以請喺加拿大定居嘅父母去唔同國家旅行。回顧以前嘅日子，係咩令沈震軒捱苦都要堅持做演員？佢話：「我好簡單，鍾意做戲。當然鍾意唔可以當飯食，我叫做比較幸運，仍然可以維持到生活，堅持到今日。我覺得自己仲有好多可能性，只係自己未發掘到，我仍然想探索更多唔同角色。」

現時沈震軒已簽約邵氏，佢解釋自己係個喜歡走來走去，嘗試新環境嘅人，認為咁樣可以令自己學習更多事物。佢又自爆視「巨石強森」（Dwayne Johnson）為偶像，希望可以一直進步：「我好鍾意佢，被佢影響好深。佢話畀人聽所有嘢都係靠自己雙手建立返嚟，鼓勵大家要努力追夢，心態好好。」

{{hket:inline-image name="11.png"}}{{/hket:inline-image}}

(巨石強森instagram圖片)

撰文：張芷晴
責任編輯：楊安莉