【買一送一?】港女切開魷魚驚見內藏細魚 質疑古惑魚販呃秤專家拆解

本港第三波新冠肺炎疫情嚴峻，市民留家抗疫煮飯仔，日前一名港女在魚檔買入魷魚，回家後一切開驚見內藏另一條小魚，遂上傳照片到網上分享，未料卻惹起網民熱烈討論，不少人質疑檔主藉此增重「呃秤」，香港海鮮聯合總會主席李彩華接受《晴報》訪問時拆解此「呃秤之謎」。

切開魷魚驚見內藏細魚

該女網民在Facebook群組「今晚煮乜好」中上傳相片，從中可見一條被切開的魷魚內竟藏有另一條紅色小魚。女事主笑稱在處理魷魚的過程，就如接生一樣「好似幫隻鮮魷做接生咁」，又徵詢其他網民有沒有遇過類似事件：

「有冇人試過？買鮮魷送小魚」

{{hket:inline-image name="1.jpg"}}{{/hket:inline-image}}

劏魷魚驚見內有小魚（Facebook群組「今晚煮乜好」)

網民質疑檔主「呃枰」

帖文引起不少網民討論，亦有人分享類似經歷，「好似每次都中」、「早兩日先試完」、「買10次8次都有魚仔喺裏面」。

{{hket:inline-image name="116153596_10158604936705960_3373284498998967039_n.jpg"}}{{/hket:inline-image}}

有網民表示經常遇到「買魷魚送細魚」的情況（Facebook群組「今晚煮乜好」)

不過，不少網民均認為事主可能遇上無良檔主「呃秤」，「正常係無可能，因所有食物都是咬碎才能食落肚」、「可能係『呃秤』，魚仔咁平」、「其實無送，佢磅俾你」；但亦有網民表示，可能只是魷魚剛好捕食小魚後，還未來得及消化便被人「撈起」，直言「見得多了，人哋冇咁得閒塞條魚入去」、「少見多怪啦」。

專家拆解呃秤之謎

香港海鮮聯合總會主席李彩華接受《晴報》訪問時指出，魷魚會進食體型較小的魚類維生，因此切開魷魚見到細魚屬正常現象，相信並非檔販存心「呃秤」。他又解釋，由於魷魚的消化系統在進食時，可以伸縮放大，因此容納到比自己體積較小、甚至大小相若的魚類；相反，要在魷魚死後，強行將一條魚塞入魷魚體內相當困難，認為此「呃秤」方式並不可行。

延伸閱讀：

太和街市買餸用八達通疑被亂扣錢 醒目港女嘟機揭檔主博懵$40收$92【查看更多】

每朝索取《晴報》：精明生活．健康家庭．開心娛樂

撰文：林幸琦