馬德鐘嘅囝囝馬在驤已經22歲，唔止運動勁、擁有1.9米嘅高大身形，而且佢同老竇如餅印一樣，被網民封為「馬神2.0」，係一個條件相當好嘅星二代。不過各位女士要失望喇，因為馬在驤已經封咗盤。
(張筱蘭微博圖片)
馬在驤係學界游泳健將，曾代表學校勇奪8面個人金牌同全場總冠軍，早前佢成為悉尼沙灘嘅衝浪救援員，獲爸爸馬德鐘大讚:「成為真正的男人是能夠拯救別人之餘，同時要懂得保護自己！」依家馬在驤喺澳洲悉尼讀緊大學，修讀機械工程，預計出年年底就會畢業。馬在驤係大學游泳校隊一分子，拎過獎牌，為港爭光，仲因為咁而識咗同學Marissa，二人一拍即合，拍咗拖一段時間。
(泳隊instagram圖片)
女友Marissa來自美國，係名游泳選手，主攻自由式同蝶式，據知佢去年開始代表美國俄亥俄州出戰，爭取奧運的入場劵，可惜東京奧運因疫情延期。去年5月，Marissa同馬在驤出席學校活動，二人喺大合照時已經企埋一齊，搭晒膊頭。
(泳隊instagram圖片)
後來，Marissa喺社交平台上載同馬在驤喺悉尼歌劇院前嘅十指緊扣合照，馬在驤亦都喺instagram上載同女朋友拖手嘅相，大方放閃。馬在驤喺留言度稱呼臉圓圓嘅女友做「小籠包」，睇唔明中文字嘅女友話唔知咩意思，馬在驤留打咗個扁咀表情。馬在驤嘅朋友見到，即刻大讚呢個花名夠晒親暱。
(Marissa instagram圖片)
(馬在驤 instagram圖片)
對於囝囝女朋友，馬德鐘點睇？佢接受本報訪問指：「未見過(Marissa)呀！唔知佢哋拍咗幾耐拖，淨係知道佢係游泳運動員，好用心練習，有紀律嘅女仔。」被問到想唔想快啲飲到新抱茶，馬德鐘回答：「年青人畀多少少時間和空間佢哋自由發展啦！了解多啲互相支持下，開開心心相處就好。」至於新抱嘅條件，佢就話：「最緊要佢哋相處融洽互相愛護，真誠對待對方。不過現在言之尚早！」
(張筱蘭微博圖片)
最近受到新冠肺炎疫情影響，馬在驤暫時休學，返咗香港，被迫同女友分隔兩地。雖然休緊學，不過馬在驤都幾忙，有意畢業後喺娛樂圈發展嘅佢近日再為活動行Show，媽媽張筱蘭相當感概，喺社交平台貼上囝囝BB照並留言：「時間飛逝，轉眼間由昨天快樂的Bebe到今天成為一位充滿正能量的愛心暖男。你今天的表演令我們非常欣慰，謝謝你的出現，豐盛了我們的人生！」另外，馬在驤知道爸爸即將開拍《飛虎之壯志英雄》，仲充當佢嘅健身教練，為佢操肌！
(張筱蘭微博圖片)
{{hket:inline-image name="18.jpg"}}{{/hket:inline-image}}
(張筱蘭微博圖片)
撰文：張芷晴
責任編輯：楊安莉