新地「萬元狂賞」 送$700萬現金券

政府派發$1萬，大家諗到點用未？黛安知道，新鴻基地產旗下24個商場如apm、東港城、V city等將聯手推出「萬元狂賞」活動，預計送出總值$700萬現金券！

新一輪嘅「萬元狂賞」有2項獎賞活動，第1項係7月1日至26日期間，逢公眾假期及周六、日共9日，每日推出「萬元狂賞」，當日喺同一個參與商場以電子累積消費金額最高嘅消費者，可獲$1萬現金券。

另一項係本月29日至下月26日推出嘅「日日獎」，只要喺新地商場以電子消費滿指定金額，即獲現金回贈，例如消費滿$500獲贈$30現金券；消費滿$1,000獲贈$80現金券。而The Point by SHKP會員只需消費滿$450及$900，就可獲相應獎賞兼賺取消費積分。