樂善堂轉贈愛計劃雪中送炭 受助單親家庭絕處逢生

九龍樂善堂早前同夥伴機構發動「樂善堂轉贈愛計劃We Share！We Can！」，希望幫助有財政困難嘅學生家庭，提供一次性緊急經濟援助。噚日父親節，一位身兼父職的媽媽就獲捐$1萬，一家三口直言係雪中送炭，非常感恩。計劃由樂善堂、夥伴機構會德豐地產、「學校起動」計劃和「香港大學社會科學院」一齊發起，為93間學校喺復課後提供支援，收集到善款後，全數轉贈予有需要學生。其中一位受惠個案係身兼父職嘅張女士，佢為養家自力更生做地盤工，養育2名讀中學嘅兒子。

但受疫情影響，張女士2月因公司裁員而失業，惟有靠打散工以維持生計，月入僅數千元。陷入財政困境，佢擔心交唔到租、養唔到兩個仔，不知不覺患上情緒病。最後申請咗樂善堂轉贈愛計劃，喺短短一星期內獲發放$1萬應急。張女士話全家剩番$600，收到筆錢好似發生奇迹，好多謝善長無私嘅奉獻。善長們如想幫助有困難嘅學生家庭，可以上網址www.loksintong.org或WhatsApp5485 1633。