全港首家精神健康體驗館 獲滙豐贊助

香港人生活壓力大，精神健康不容忽視。黛安收到風，由滙豐支持、本港首間精神健康體驗館（Mind Space）正式落成，入面設有虛擬實境技術嘅互動體驗室，可以模擬精神病常見嘅病徵，例如幻覺同幻聽等等，藉此提升社會對精神健康嘅關注同認識。

呢個精神健康體驗館係由青山醫院構思同籌建，獲得「滙豐150周年慈善計劃」贊助，除咗模擬體驗，亦有介紹青山醫院歷史、精神病治療同藥物發展等等。院方仲請咗部分精神病康復者喺展館做朋輩支援員，即場同參觀者交流；體驗館計劃喺年內開放畀公眾免費參觀，預計每年可以接待1.6萬人。

滙豐集團總經理兼亞太區環球銀行業務主管廖宜建話，唔少人因為社交、工作或個人生活面對壓力，導致出現精神問題；近期嘅疫情亦為唔少人帶嚟壓力同負面情緒，所以大家除咗要主動關心身邊人，更要注意保持精神健康啊！