新世界免青年廣場場租 助本地藝團

最近幾個月唔少藝術團體嘅工作都受到疫情影響，新世界公關姊妹同黛安講，新世界作為青年廣場嘅管理公司，嚟緊會推出「共創節目試行計劃」，以免場租方式，幫助本地藝團繼續舉辦節目同活動，一齊共渡時艱。

姊妹話，新世界喺6月至12月會免去場地租金，藝團只要向新世界提交合適資助計劃，通過審批後，藝團出show後才按票房收益比例，收取小部分費用，希望可幫助本地藝團開拓新路，渡過難關。新世界設施管理一直以培育和發展青年潛能為任務，支持青年貢獻社會，有興趣嘅藝團，本月底前可透過電郵ysinfo@youthsquare.hk查詢。