港郵政發行《香港館藏選粹》 展示張大千唐寅等名家名作

黛安細細個已有集郵習慣，最近知道香港郵政發行咗以「香港館藏選粹——至樂樓藏品選」為題嘅特別郵票，好開心。今次一套6枚郵票及小型張，展示咗5幅書畫名家嘅作品，包括張大千《潑彩山水》、唐寅《桃花菴》、石濤《寫黃研旅詩意冊》、陸治《采芝圖》和陳字《山水人物雜冊》，都係獨一無二嘅瑰寶。

聽公關姊妹講，至樂樓藏中國書畫係慈善家兼收藏家何耀光嘅私人珍藏，他過身後，家人將呢批藏品捐贈畀香港藝術館。呢批書畫包括宋代至近代藏品，以明、清兩代各流派作品最豐富，喺文物界同藝術界備受推崇。

其中唐寅《桃花菴》以3枚郵票拼湊而成，畫作秀潤流麗；小型張就展示咗張大千繪畫嘅《潑彩山水》，係佢為祝賀何耀光60大壽而作。各郵政局已發售緊呢套特別郵票同郵品，有興趣可以透過網站：stamps.hongkongpost.hk訂購。