新世界招募100位大學生 虛擬實習彈性返工

今年經濟唔好，大學生想搵實習機會真係唔容易。黛安就收到好消息，新世界集團今年特別推出虛擬實習計劃，招募100位實習生，計劃其中一大特色係虛擬實習，學生大部分時間係透過網絡同視訊會議提交及滙報工作，方便佢哋隨時隨地工作，安排更富彈性。

實習生仲可以透過綫上綫下接受培訓，例如參觀及與管理層分享等，為佢哋提供豐富嘅閱歷，安排夠晒周詳。

計劃仲可以畀實習生親身體驗多項「創造共享價值」項目，了解企業如何透過社會創新多項環節，例如了解新世界集團嘅口罩生產計劃及如何向基層派發口罩等，相信一定可以令學生大開眼界。

公關姊妹話，今次甄選會較注重人才質素同個人潛能，例如申請者是否具備企業家精神同創新思維等。計劃即日起接受各大專院校學生申請，6月7日截止，面試都喺6月進行，實習期由7月中至8月底。同學仔要把握機會喇。