威尼斯建築雙年展改8月舉行 主題：「如何一起生活」

之前因為疫情，黛安同讀者一樣都多咗留喺屋企，有時都會思考下未來生活。最近全球各地都慢慢恢復經濟活動，建築界兩年一度嘅盛事「威尼斯建築國際雙年展」，8月底就會喺當地舉行，今年主題正正係「我們將如何一起生活？」（How will we live together？）。

黛安噚日同香港策展團隊了解過，總策展人、華懋集團執行董事兼行政總裁蔡宏興話，今年有多達19隊來自企業、學界同非牟利機構組成嘅參展團隊，佢哋會就「重新分配︰天、地、人」呢個主題提出唔同見解，例如點樣善用土地資源，改善香港嘅宜居程度；其中一隊參展隊伍代表建築師鄧業基（Kharlie）就透露，佢哋會用「氣味」作為媒介，反映城市點樣轉變。

目前疫情仍有好多變數，意大利亦係歐洲嘅重災區，蔡生都話要見步行步。即使去唔到威尼斯都唔緊要，香港明年第一季就會舉辦回應展覽。建築師學會會長李國興（Felix）同黛安講，希望展覽可喚醒大眾對環境同氣候危機嘅關注，到時再有消息，黛安會第一時間再同大家分享。