「香港故事」攝影賽作品 海港城免費睇

影像嘅力量一向唔可以睇小，黛安知道，《國家地理》雜誌與會德豐地產第三度合辦嘅攝影大賽，得獎作品由今日（2日）起至4月19日會喺「海港城‧美術館」展出，公眾可免費入場參觀。

公關姊妹介紹，本年度攝影主題係「香港故事︰自然，城市和人物」，大賽分為自然、城市、人物、手機攝影及黑白攝影共5個組別，作品展示咗香港人嘅生活點滴、本土特色風景。今次收到近3,000件參賽作品，當中有業餘攝影愛好者，亦有專業攝影師，佢哋唔只來自香港，仲有澳門、台灣、中國內地，以及西班牙、美國等，共15個國家及地區，競爭相當激烈。

大會評委之一嘅美國國家地理攝影大師凱薩琳‧卡諾（Catherine Karnow）話，無論係得獎定入圍作品，都呈現出色技藝及無窮創意。會德豐地產主席梁志堅亦話，很榮幸連續三屆與《國家地理》雜誌攜手合辦呢個大賽，延續每年香港嘅攝影盛事，等更多有才華嘅攝影師可以藉着呢個比賽實現攝影夢想。