煤氣贊助6000支消毒劑 與食肆齊抗疫

現時出街食飯或多或少都擔心接觸到病毒細菌。黛安聽公關姊妹講，原來香港中華煤氣有限公司由今個月開始，推出咗為本港食肆免費噴塗納米光觸媒長效消毒劑計劃，累計幫大約1,000家食肆完成消毒喇！

呢個納米光觸媒產品和技術係由本地創科公司研發，有國際認證可消滅病毒同細菌達99.9%，有效達3個月。已噴塗咗嘅食肆都會貼出煤氣公司特別設計嘅標貼。聽公關姊妹講，上星期五（27日）仲舉行咗「煤氣公司全力抗疫消毒大行動」儀式，將6,000支消毒劑免費提供畀本港食肆。煤氣公司常務董事陳永堅話，希望可以令市民對食肆衞生環境更有信心，同大家共度艱難時刻。