【新冠肺炎】缺德巴士大叔拒戴口罩 車長送口罩反被罵：你驚乜嘢

新冠肺炎（武漢肺炎）疫情擴散，本港確診人數持續增加令人人自危，市民紛紛戴口罩自保以減染病風險。不過近日網上一名大叔搭巴士時卻沒有戴口罩，即使車長好心勸喻及贈送口罩，仍堅持拒戴，甚至反罵車長「你驚乜嘢啫？」有乘客不齒其自私行為，怒斥「咁冇公德心㗎」，並促請他下車。

有網民前日 (15日) 於facebook群組「大埔 TAI PO」發布一條約10分鐘的片段，指於當晚8時，一位大叔登上來往大埔及佐敦的271線九巴時，並沒有戴上口罩，「被司機勸告帶口罩否則不開車，仲私人送上一個。他一直拒絕，又唔肯落車！」

於片段可見，巴士車長向大叔遞上一個外科口罩，勸籲他「冷靜啲，個口罩係新㗎」，反被大叔罵道：「咩事先，你而家迫我戴啊？香港地有自由㗎嘛！」有乘客聽後隨即聲援車長，惟大叔向乘客伸出手指挑釁，回頭再向車長稱：

「你驚乜嘢啫？我搭咁耐車都冇戴口罩！」

有乘客聽後立即反駁，「你唔驚人哋驚啊大佬」、「唔好咁自私」、「咁冇公德心㗎」，但阿叔依然故我，更揚言「根本就冇事！」不少乘客不甘大叔的囂張態度，異口同聲斥責他：「你做咩唔戴口罩」、「咁簡單你戴個口罩咪得囉」、「阻住成車人，你戴咪開得車」，更有乘客揚言已經報警，並叫司機不要開車，等待警察到場處理。

期間，啊叔不斷出言挑釁，更指「大把醫生都冇戴」、「而家有規定要戴口罩咩」，引來大批乘客叫他下車，更有乘客指「我畀夠廿蚊你，你走啦！」及至片末爭執仍未止息。網民補充指最後有警察到場請該名大叔下車，巴士車長則開車繼續行程。

片段引來網民熱烈討論及瘋傳，有人狠批大叔自私、「 口罩人地比(畀)到佢都唔帶害人害己」，亦有人感嘆「 唉… 連自己都唔保護好，相信都無諗佢屋企人，更何況其他人呢」、「退一步為他人設想可以嗎？人不可太自私⋯⋯」。

最新口罩供貨消息：

【不斷更新】各區商戶最新供貨消息

撰文：賴天兒

精選健康知識，盡在 Healthy Life 健康男女

https://fb.com/HealthyLifeExpress/