綠領行動籲重用利市封 實踐環保減砍伐樹木

聽日（8日）就係農曆正月十五，唔知大家拆咗利市未？黛安一直好支持重用利市封，環保團體綠領行動連續第11年舉辦嘅「利市封回收重用大行動」已經開始咗，仲獲得87間機構支持，希望能回收超過1,000萬個利市封重用。

綠領行動總幹事何漢威同黛安講，過去一年全球發生好多災害，大自然環境同野生動物受到嚴重威脅，希望大家學會尊重自然生態系統，減少砍伐樹木，從回收利市封等細節實踐。

何漢威話，由即日起至2月19日，港九新界達362個商場、個人護理產品店、屋苑、銀行設置利市封收集箱。現時「武漢肺炎」肆虐，針對機構及市民關注利市封回收嘅衞生問題，佢哋亦特別向各參與機構發出指引，以減少大家的擔心。呢個活動咁有意義，大家一定要支持呀！