5米高My Melody同你賀中西情人節 利園區打卡兼歎美食

元宵節同情人節好快就到，公關姊妹預告畀黛安知，銅鑼灣利園區會趁佳節打造多個打卡點，即日起就有5米高嘅My Melody同可愛Little Twin Stars登場，2大打卡位仲加入Hello Kitty、Cinnamoroll、Pompompurin及Kerokerokeroppi等Sanrio好友，畀大家盡情打卡留倩影。

如果想喺情人節同另一半食個燭光晚餐，公關姊妹話，利園區內有多間餐廳都會推出情人節限定套餐及甜點，好似名廚James Sharman主理嘅全新英式餐廳酒吧The Leah、墨西哥美式餐廳酒吧Cadillac Bar & Grill等，想食各式風味大餐都得。另外，仲有多款情人節限定朱古力及糖果禮盒，包括La masion du chocolat、Sift Patisserie等，賣相同味道都一流㗎。

另外，只要喺利園區消費滿指定金額，其中包括最少一張由食肆發出、以電子貨幣單一消費滿100元或以上嘅單據，即可享額外1小時免費泊車券。如果以電子貨幣消費滿3,000元，仲有機會贏得「新春開運即抽即中大抽獎」總值200萬嘅豐富獎品。