3中四女生製「人工葉」 減緩氣候變化奪大獎

氣候變化係全球面臨嘅大挑戰，黛安收到風，3個來自聖保祿學校嘅中四同學馬綽盈、吳汶蔚同盛卓欣，就透過實驗利用藻類製作「人工葉」來模擬綠葉嘅光合作用，減輕氣候變化嘅影響，呢項化學實驗最近仲奪得由化工公司巴斯夫及中大合辦嘅「巴斯夫小小化學家－實驗挑戰賽」冠軍！

黛安知道，冠軍隊伍嘅靈感來自藻華問題（又稱紅潮或綠潮），3位同學就係用藻類製造「人工葉」，吸收同儲存大氣中嘅二氧化碳，為咗延長其壽命，佢哋仲使用海藻酸鈉將藻類鎖住喺「人造葉」內，呢個設計概念除咗有助解決由藻類引起嘅生態環境問題，更有望減緩氣候變化。至於比賽第2名嘅係港大同學會書院嘅同學，瑪利諾修院學校同學就獲得第3名，大家嘅實驗產品都非常有創意，黛安覺得佢哋真係好厲害啊。