【慘過離婚】黃心美受妹牽連歷低潮人生洗牌 長女「被迫」逞強：爸爸見到好心痛

黃心穎去年4月與許志安爆出「安心偷食」，身為大家姐兼圈中人嘅黃心美亦受牽連。除咗被傳媒追訪外，社交平台亦被海量留言攻擊，有傳心穎嘅事唔單止影響佢嘅司儀工作，甚至導致佢同男友馬桂烽分手，心美同時間面對一連串家庭、事業同感情問題挑戰。

{{hket:inline-image name="a2144cfb-1c03-4e82-a5a9-5b5dd4522a1a.jpg"}}{{/hket:inline-image}}

（東星娛樂）

心穎喺事件發生之後離港避靜，身位家姐嘅心美自然成為焦點同追訪對象。心美獨自面對各種負面新聞同抨擊足足八個月，終於心穎喺上年12月由美國返港。作為大家姐嘅佢對妹妹返港面對自己做過嘅事，覺得鬆一口氣同戥細妹開心。心穎返港後佢同家人一齊喺妹妹屋企「匿埋」食冬至飯，心美認佢為呢餐飯別具意義，喺邊度食都唔緊要，最緊要一家喺一齊。

{{hket:inline-image name="25036494_1973683926217539_679821828931190784_n.jpg"}}{{/hket:inline-image}}

心美一家關係非常好。（黃心穎IG）

有傳心美因為心穎嘅形象唔好關係「失Job」，心美認為屋企人冇所謂拖唔拖累，仲表示會撐阿妹撐到底：「我喺呢件事立場係佢係做錯，我知，全世界自己都知，千錯萬錯佢都係我妹，你哋想我可以點樣？我嘅立場係呢世都不離不棄。」但佢亦深明很難要大家將心比己，對她的角色感同身受。心美舊年嘅收入係之前兩年嘅三分一，但係都夠生活。佢表示就算冇「安心事件」，舊年嘅經濟唔好都會影響到佢收入。不過佢都睇得好開：「呢一行係好被動，好天搵埋落雨食，冇嘢做咪慳啲使，我夠使夠用，自己又唔大貪。」

{{hket:inline-image name="54247743_311639766191740_3910623822784433228_n.jpg"}}{{/hket:inline-image}}

兩姊妹一齊入娛圈，更加明白彼此感受。（黃心穎IG）

心美承認過去一年曾經歷一段低潮時間：「我唔開心唔會同全世界講，因為已經捱過咗，所有嘢堅持咬實牙關，冇嘢係捱唔過，或者我根本冇勇氣去死。」佢話以前覺得人生最痛苦係離婚嗰段時間，不過經歷上年嘅人生低潮，覺得離婚都唔算得啲咩。

{{hket:inline-image name="17438756_403835153306073_8486406123316838400_n.jpg"}}{{/hket:inline-image}}

（黃心穎IG）

去年傳因心穎事件導致心美同富貴男友馬桂烽分手，一向低調處理感情事的心美之前一直都否認，今次終於都默認二人分手：「我係好瀟灑嘅人，發覺有問題就分開，唔好阻大家時間，然後默默去祝福佢。」對於未來嘅感情及婚姻，她覺得上天自有安排，所以從來不去強求及屈就。

{{hket:inline-image name="27575411_152488182222707_2783922093878673408_n.jpg"}}{{/hket:inline-image}}

一屋四個公主。（黃心穎IG）

隨住父母年紀漸大，心美膊頭上嘅負擔亦愈來愈重。大家姐身份令到佢強迫自己要堅強同擔起重擔：「我知自己要好堅強，我爸爸係全世界唯一一個男人睇到我逞強，有時佢會話唔使扮到好堅強，因為咁令佢見到仲心痛。」過去一年大部分時間媽咪身在溫哥華，心穎唔喺香港，而另外兩位妹妹都有自己家庭，心美都係靠爸爸嘅鼓勵為佢叉電：「絕大部分時間都係我同爸爸一齊，我陪吓佢食飯，佢有好多安慰說話，始終工作上有好大改變，屋企又成日有好多新聞。」

{{hket:inline-image name="15624339_1198832753530905_8279210857938812928_n.jpg"}}{{/hket:inline-image}}

同爸爸關係好Close~（黃心穎IG）

撰文：黃蘊姿