本地寶萊塢團隊 活力舞蹈賀新春

仲有幾日就到鼠年，黛安知道，農曆年初一至初四（25至28日）旅發局會喺西九文化區藝術公園，舉辦一連4日新春嘉年華滙演。由香港、印度及尼泊爾籍舞蹈表演者組成嘅本地寶萊塢舞蹈團隊BEYOND Bollywood，今年係首次參與新春滙演，佢哋希望透過充滿活力嘅寶萊塢舞，推廣文化共融。

BEYOND Bollywood藝術總監、來自印度嘅Uday Sathala同黛安講，今次新春表演名為「發光發亮」，概念嚟自印度嘅「排燈節」，表演團隊會喺舞台上呈現印度半古典舞、民族棍子舞，同埋寶萊塢邦拉舞共3種唔同風格嘅舞蹈，仲會通過身體動作同面部表情變化，表達故事嘅含義。

黛安同加入呢個舞團大約兩年嘅香港成員周詠儀（Krystal）傾偈，佢話十幾年前喺南亞裔同事介紹下，睇咗套寶萊塢電影《Kal Ho Naa Ho》（愛，沒有明天），畀戲入面嘅歌舞表演同華麗衣着吸引，從此對印度舞產生興趣，仲喺幾年前信埋印度教同投身舞蹈教學工作。Krystal話，過去幾個月嘅示威令到訪港旅客大減，希望旅客趁農曆新年嚟香港玩時，可以去西九感受下新春嘅歡樂氣氛。

公關姊妹提醒黛安，今次新春滙演會場外圍會有交通管制措施，私家車同的士都唔能夠進入會場，大家去睇滙演記得盡量搭公共交通工具喇！