【晴報專訪】截肢嗎啡止痛上癮覆診為攞藥 骨癌少女醒覺戒癮：好似吸毒

「咁我真係有需要吖嘛，所以食都冇問題吖！」19少女鄭泳珊（Suki）2年前不幸確診骨癌，需切除左邊盆骨左腿保命，手術後學習如何「一腳走天涯」。回想過去2年抗癌路，泳珊坦言曾因依賴嗎啡藥止痛而上癮，情況猶如吸毒般可怕。所幸她驚覺有異後及時戒癮，並希望其他癌症病人及家屬要多加注意此問題。

{{hket:inline-image name="SAN06210.jpg"}}{{/hket:inline-image}}

泳珊坦言曾因依賴嗎啡藥止痛而上癮。（羅灝駿攝）

「嗰段經歷好可怕。」泳珊在兒童癌病基金社工的陪同下，接受《晴報》訪問時表示，自己沉迷嗎啡止痛分兩個時期，分別是確診患癌及截肢後。確診患癌後因疼痛難忍，她需服用醫生處方、劑量強勁的嗎啡藥來止痛；起初有效用，但慢慢因抗藥性效用不大而擅自加密食用次數，

「醫生話4個鐘先可以食一粒，但自己私底下2個鐘食一粒。之後發覺冇乜用，於是食多幾粒，食嗰吓有一種鬆弛咗嘅感覺，但可能只係鬆弛半個鐘。」

但當時她心想「咁我真係有需要吖嘛」，所以認為自己此舉並無問題。至截肢後留院時，她繼續經常向護士索取劑量強勁的嗎啡藥，

「姑娘見我成日都攞，佢就話『唔准呀，唔准再食，忍住！你有止痛機㗎嘛，唔可以食，會上癮㗎！』」

{{hket:inline-image name="SAN06172.jpg"}}{{/hket:inline-image}}

泳珊手術後學習如何「一腳走天涯」。（羅灝駿攝）

護士的一席話當頭棒喝，此時泳珊才發現原來長期依賴嗎啡藥來止痛是會上癮。隨著手術傷口慢慢癒合，出院時其痛楚亦漸漸消退，「未至於撕裂咁痛」；但回家後，她仍依舊對劑量強勁的嗎啡藥「心掛掛」，

「嗰陣時都有少少痛，但未至於要食咁劇烈嘅藥，食返普通嗎啡藥水已經可以。但嗰時仲有一盒（劑量強勁的嗎啡藥），就想間唔時食吓。」

她表示，自己當時截完肢沒多久，人生沒有方向，「好憔悴，個人好得閒冇目標，又唔諗住考DSE，跟住就掛住食（劑量強勁的嗎啡藥）。父母見到我成日食，認為我上癮，於是就收埋咗。但之後我搵到盒藥，之後靜雞雞成日食，搞到成個床下底都係藥紙，就察覺到自己真係有問題。」

但泳珊仍未打算「收手」，由於該盒藥即將吃完，因此打算趁覆診時再索取劑量強勁的嗎啡藥。覆診前，她上網搜查有關藥物成癮的資料，終於搞清楚自己的狀況，

「上網知道有同類上癮個案後，我心諗：『唔係呀嘛，搞啲咁嘅嘢！』我覺得係等如食緊毒品咁，好驚！」

{{hket:inline-image name="ws170120203.JPG"}}{{/hket:inline-image}}

成功戒癮後，泳珊才敢將此段經歷向父母如實相告。（受訪者提供）

但抑制自己後卻感到痛苦，其脾氣開始變得暴躁，

「經常諗住：『唔得呀，我一定要食藥！我呢世都要食藥！』傻咗咁！見到盒藥冇乜，於是就同爸爸講想睇醫生，策畫攞藥。」

最終，她在覆診時開口向醫生索藥，打算「攞埋呢次」。幸運的是，該種藥已經停產，泳珊「晴天霹靂」下只好「的起心肝」，終成功慢慢將心癮戒除。成功戒癮後，她才敢將此段「黑暗經歷」向父母如實相告。

香港癌症基金會：止痛藥有「上癮」及濫用可能

根據香港癌症基金會資料顯示，嗎啡的用藥方式包括口服藥片、藥水、栓劑或針劑。不少使用嗎啡的患者都擔心自己會上癮，或受藥物影響而變得神志不清；其實以嗎啡止痛未必會令人上癮，但突然停用嗎啡反而不智。然而，止痛藥仍有「上癮」及濫用的可能，但醫生會按照患者的個別需要處方適當的嗎啡劑量，並只會在痛楚加劇時才會提高劑量，痛楚減輕後即會逐步減藥，癌症患者於止痛的原則下使用嗎啡而上癮的情況較罕見。

延伸閱讀：【晴報專訪】骨癌截肢崩潰怪責父母感內疚 少女自強抗癌：多謝冇嫌我陀衰家

撰文：李凱晴