「歲次庚子」郵票登場 喜慶巧鼠賀新春

黛安細個嘅時候鍾意集郵，即使出嚟工作之後，只要有新郵票發行都會特別留意。聽講香港郵政喺今個星期六（11日）將會推出「歲次庚子」鼠年賀年郵票，到2月4日立春日（即農曆正月十一日）就首次發行以「二十四節氣-春」為題嘅郵票；今年首發嘅兩套特別郵票，發行日期集合咗6個「1」，真係非常特別。

今個星期六發行嘅鼠年特別郵票，包括一套4枚嘅郵票（每套售15.6元）、絲綢郵票小型張同賀年卡等集郵品，都係以工藝品為主題，分別展示泥塑、刺繡、陶瓷同玻璃工藝嘅巧鼠造型，為農曆新年增添唔少喜氣。至於同日推出以「寶豬巧鼠」為題嘅十二生肖金銀郵票小型張，背景就係橙紅色襯托嘅杜鵑花圖案，又靚又高貴。

除咗賀年郵票，農曆正月立春之日發行嘅「二十四節氣-春」共有6枚郵票，介紹春季6個節氣立春、雨水、驚蟄、春分、清明和榖雨，仲首次採用半圓形設計，會以左右對倒方式排列，好有收藏價值，每套售12元。

香港郵政總經理（集郵推廣及銷售）鄭志偉話，歷年嘅生肖郵票都好受歡迎，預計市民對鼠年特別郵票嘅反應都會好理想。