肌肉萎縮症攝影師 用鏡頭展示生命

做人最重要有正能量，好似本身患肌肉萎縮症嘅21歲攝影師凌子軒，從來無因為身體嘅障礙影響佢對攝影嘅熱情。黛安日前喺港鐵上環站同西灣河站睇咗「生命與希望-凌子軒攝影展」，展出咗15張子軒嘅作品，展示佢透過鏡頭紀錄生活片段，捕捉佢所見到嘅希望、自由同美麗。

今次展覽嘅相片主要分為4個主題，分別係希望、生命、自由同過客。喺4個主題裏面，子軒覺得生命中最重要嘅係希望，有咗希望先會有方向；有自由先有機會發揮所長，實現自己嘅希望。而喺實現過程中，又會遇到唔少燃亮生命嘅過客，我哋同時亦係人哋生命嘅過客，一齊發光發亮。

港鐵公司事務總監蘇家碧都話，子軒透過呢組相片展現出佢對希望、自由同熱愛生活嘅追求，希望可以藉此感染大家。港鐵亦希望為更多年輕藝術家提供平台，等佢哋可以藉住自己嘅創意同大家分享所見、所感、所想。黛安就覺得，今次作品展同攝影師本人一樣充滿故事，睇完絕對會對生命有唔同睇法，呢個展覽去到4月1日，大家記得去欣賞下！