「黃金海岸農墟」 撑本地農產品

呢幾日返工，聽到人講笑話︰「每逢佳節胖三斤」，皆因過時過節大飲大食，好易變肥。不過黛安就無咁嘅煩惱，皆因我哋呢啲職場女士最注重健康，先幾日同好姊妹開Party，都以有營美食入饌︰純素蛋糕、有機沙律，仲有我認為全場最好食嘅紅菜頭野菌risotto，健康又好味！聽到入得廚房、出得廳堂嘅好姊妹講，原來個risotto係佢早前喺黃金海岸農墟上跟一位大廚學嘅。

最近香港農墟平台為響應「有機十二月」活動，喺全港多處舉辦多場農墟。據講12月係全年蔬菜生產最豐盛嘅季節，平台希望借呢個機會，等市民試下本地出產嘅新鮮農產品。

如果你錯過12月嘅活動都唔緊要，皆因2020年1至5月，黃金海岸商場會定期喺每月特選星期日繼續搞農墟，嚟緊最近一次會喺1月12日舉行，除咗有本地農場出售嘅有機農作物，仲有工作坊及現場表演，等大家可以體驗下綠色生活，詳情可留意黃金海岸商場facebook！