香港會計師公會出版《理財十課》 趣味漫畫推廣兒童理財

網上付款系統簡單又快捷，好多手機遊戲都設有付費道具；黛安認識唔少有仔女嘅朋友都話，小朋友用佢哋部手機玩時偷偷課金，搞到佢哋好頭痛。黛安知道，會計師公會為咗畀小學生認識點樣理財，最近特別製作咗一套10冊嘅漫畫書，將先後推出電子版同實體版，今個月底開始，就會去唔同學校推廣，向學生哥分享理財技巧。

公關姊妹同黛安講，香港會計師公會喺2005年推出「窮小子、富小子」計劃，派會計師大使去中小學舉行理財工作坊，去年總共辦咗57場講座，共有9,800名學生受惠。香港會計師公會會長羅富源話，因應社會轉變，新嘅金融工具陸續出現，公會今年推出針對小學生、一套10冊嘅《理財十課》漫畫書，係以3個卡通人物介紹理財概念，包括收入、需要和想要、儲蓄、精明消費和付款方式等。

公會社會服務工作小組成員潘宏烽介紹，呢個計劃過往嘅教材以文字為主，新漫畫書可以迎合小朋友喜好，用太空、恐龍時代等背景吸引佢哋閱讀，書末亦有家長導讀。負責多元學習嘅聖公會聖彼得小學主任黃天忠就話，教材可以令小朋友了解金錢，也可融入通識教育，畀佢哋早啲認識投資工具，甚至認識會計師嘅職業，作為生涯規劃教育一環。

羅會長補充，父母應避免將連接銀行帳戶嘅手機交畀小朋友，亦有責任喺孩子花錢時教育佢，究竟物件係「需要」或「想要」，等佢哋學識唔會亂使錢。黛安都覺得幾位專家嘅意見好值得參考呀！