行山App TrailWatch 5年郊野紀錄展覽 將山水風光化成藝術品

登高望遠，最能洗滌都市生活中嘅煩擾鬱悶；如果想回味行山嘅舒暢感，黛安知道由藝術家兼策展人關朗曦聯乘行山手機App「TrailWatch」搞嘅「Hike & Seek︰TrailWatch 5周年展覽」，除咗將60位TrailWatch用戶過去5年嘅行山紀錄同照片整合外，仲以投影地圖、生物裝置藝術、自然錄音同山野文學等形式，將山上風光轉化為藝術品！

TrailWatch項目總監程德欣話，依家程式擁有10萬用戶，總共記錄咗成400萬公里嘅行山旅程，仲會搞義工訓練計劃、山野無痕教育︰「今日嘅香港，更需要保護我哋嘅獨特郊野。」

關朗曦就笑言，自己行咗好多年山，但籌備展覽都用咗4個月︰「開頭對住70萬幀郊野相片紀錄，其實都有啲無從入手，後來諗到不如將『不期而遇』嘅感覺貫穿成個展覽；所以部分展品用咗唔同嘅高度架設，希望重塑番行山時『尋找』嘅狀態。」

「供相者」之一、愛山人潘先生就話，自己用咗個App已3年，通過相關義工課程知道更多香港郊野面對嘅威脅及破壞，所以行山時都會用番App上嘅舉報功能︰「好似喺大嶼山行山發現有人懷疑非法倒泥頭，都會即刻影相上載；之前無諗過咁樣可以幫到環團持續跟進追蹤，令我行山同時，都可以保護到香港郊野。」