參與工作坊 玩互動遊戲兼抽獎 同Pokémon過聖誕

下個月就係聖誕節，又到咗周圍去睇燈飾、睇裝置藝術打卡嘅日子喇！黛安知道，嚟緊港九新界唔少商場都會有各式各樣主題嘅聖誕打卡裝置，好似Pokémon、LITTLE TWIN STARS、小熊等等，造型得意之餘，再配合工作坊、互動體感遊戲等，聖誕氣氛爆登！

Pokémon可以話係90年代陪住大家成長嘅卡通，由下星期五（15日）起至明年1月1日，一眾Pokémon將會去到時代廣場，準備咗9大聖誕夢幻拍照專區，現場會有1︰1原尺寸嘅2米高超夢、瞓緊覺嘅1.5米卡比獸；仲有以多達50個3D精靈球組成嘅7米高巨型Pokémon聖誕樹，以及Pokémon聖誕滴膠筆盒工作坊等，節目相當豐富。

唔少大人同細路都鍾意Pokémon，夢幻糖果色調同甜美可愛風格嘅LITTLE TWIN STARS，當然亦有大把粉絲！本月16日起，兩位主角KIKI同LALA會以全球首度曝光嘅新造型來港亮相，將東港城化身成冬日森林。黛安知道，4大森林打卡場景包括6米高巨型LITTLE TWIN STARS夢幻聖誕森林城堡、LALA留聲機，仲有糅合光與影體感互動遊戲嘅樹屋，入到嚟大家可以腳踏投影鋼琴，挑戰驗靈敏度，共奏聖誕樂章。

至於置富Malls，就請來日本療癒小熊「小熊學校」遠道而來，即日起去到11個置富旗下商場舉行盛大嘅甜品派對，主角Jackie、男朋友David等角色配合鬆餅、布甸、蛋糕等精緻甜點造型裝飾，sweet得嚟又可愛，12月起仲會有聖誕幸運大抽獎！咁多打卡熱點，全部好玩又精采，大家千祈唔好錯過啦。