駱應鈞從影40幾年，大多數角色都係反派，演技或大有發揮空間，卻一直未能擔正。雖然唔係主角，但佢喺觀眾心目中，絕對係好戲之人。
（網上圖片）
駱應鈞於1973年考入邵氏演員訓練班，並簽約為基本演員，之後因工作量不足解約，1975年投考第5期無綫電視藝員訓練班，並加入無綫電視成為旗下藝員，拍咗超過100套劇集。2012年初離開服務咗30幾年嘅無綫，簽約香港電視網絡，至2015年4月約滿回復自由身。
相關新聞：譚炳文心臟手術後又受骨刺折磨 幸有乖女貼身照顧中西合壁治理
（網上圖片）
出身書香世代
80幾年前大學生非常珍貴，而駱應鈞父母都係大學生，佢可以話係出身書香世家。不過佢就好謙虛：「但比起人哋個阿爺係乜嘢著名教授、作家嗰啲，書香世家真係受之有愧，面紅呀！」然而佢父親都唔係含住銀匙羹出世，駱應鈞話阿爺當年係散盡家財供佢阿爸讀大學，後尾讀完大學，就嚟咗香港做小學校長。
（網上圖片）
一門四傑
所謂「虎父無犬子」，駱應鈞家有4兄弟姊妹，他排行第3，上有2個家姐，下有1個細佬。除了二家姐一直都是全職家庭主婦外，大家姐駱友梅和細佬駱應淦來頭也不小。前者下嫁著名作家林行止；後者1977年港大法律系畢業，其後獲委任為御用大律師，1997年更曾出任高等法院特委法官。
駱應鈞話後來見其他兄弟姊妹愈嚟愈出名都驚「陀衰家」，所以言行舉止都非常檢點，最壞已經係當街「打邊爐」（企喺垃圾桶旁吸煙）。講起當初入行，駱應鈞爸爸當時係好唔鍾意。當年佢簽約時未夠21歲，要家長簽名，爸爸當時表示極之唔接受，不過佢鍾意就無辦法，實質都好開通。
（駱應鈞微博）
演藝生涯苦同辣多過甜
講起佢嘅演藝生涯，佢形容苦同辣多過甜，唔開心日子會多過開心日子：「因為當你有啲工作做嘅時候，當然希望會愈嚟愈多，但係世事嘅嘢無話咁順利，如果係咁順利，依家可能已經唔係呢個位置，可能會再高啲。所以基本上會有好多難言嘅挫折。」
（駱應鈞微博）
入院「大維修」
今年年初駱應鈞喺一次心臟檢查中發現有腎石問題，醫生叫佢考慮做唔做手術，唔做手術，就可以每年去做檢查，或者食藥。不過駱應鈞考慮到，將來年紀大咗情況惡化，身體更加承受唔到，所以最終都做咗手術，手術後休息咗足足4個月先完全康復。
呢次係駱應鈞人生第一次住院，由於要進行2次繁複手術，一住就住咗佢40幾日。休息咗一段日子，駱應鈞話搵開佢拍嘢嘅人突然冇晒：「嗰段時期有啲工作接唔到，亦都費事同人解釋發生咩嘢事。唔知點解，呢段時期就靜咗好多，但都無所謂，既然啱啱做完一個手術，咪趁呢個時候休息吓囉。」雖然已經好耐冇喺香港見過佢嘅作品，但近月駱應鈞再次喺內地出活動兼進行拍攝，相信好快會有新作。
（駱應鈞微博）
「珍珠婚」夫妻相處之道
駱應鈞同佢結婚29年嘅太太都有一套相處之道。依家佢經常去內地工作，但太太從來都唔會「監場」，駱應鈞亦好感激太太喺佢冇工作嘅時候默默支持佢：「因為都老夫老妻，大家都會好了解，互相遷就。有時候大家有啲意見不合嘅時候，我都會諗番當年老婆點樣對我，咁我都會讓吓步，因為佢都咁支持我。」
咁多年嚟駱應鈞都係緋聞絕緣體，佢話係因為自己「玩唔起」：「同太太簡簡單單生活，唔好有太大壓力，已經好感恩，唔敢再節外生枝，因為怕輸唔起，唔敢行差踏錯。」 佢話自己唔係一個好主動嘅人，亦因為唔係好「出位」，完全無遇到有女士對佢主動。
（駱應鈞微博）
性格決定命運
駱應鈞相信性格決定命運，佢認為自己唔鍾意同人爭、同人硬撼，令自己依家都無乜大改變，都係鍾意穩穩陣陣：「有時啲嘢如果要去爭取嘅，就會睇吓機會有幾大，會同自己講，完全唔客觀嘅，唔好同人爭喇，無就算啦。」雖然唔積極，但佢就覺得少咗好多壓力：「我寧願無咁叻，無咁有出息，總之自己過到日子，生活上過得到就算喇，我就係咁嘅性格。」每個人都有自己嘅選擇，只要係令自己愉快、舒服，又何必硬要跟住時代巨輪去改變自己呢？
撰文：黃蘊姿