李嘉誠基金會贊助12位大學生訪澳洲 推動年輕人改變世界

長和系前主席李嘉誠（誠哥）素來支持科研教育，黛安收到風，嚟緊10月6日至10日，李嘉誠基金會同中大、理大、科大及港大會合辦《科技未來》活動，贊助12位大學生去澳洲悉尼同阿德萊德，參觀當地嘅創新科技發展項目，非常有教育意義。

黛安聽公關姊妹講，今次學生參觀嘅項目包括衞星物聯網系統、泥土吸納二氧化碳技術、未來量子電腦以及創科孵化基地等，12位大學生唔單止大開眼界，仲可以與唔同嘅科企創辦人交流，親身聆聽佢哋改變世界嘅故事，黛安真係非常羨慕。有份參加今次澳洲之旅嘅12名同學，都係經4間大學推薦，嚟自數學、法律、財務、產品設計、工程等專業，可謂人才濟濟。

其實，李嘉誠基金會投資喺青年嘅工作從未間斷，好似今年8月初，6位《南極環流探索》創作比賽嘅得獎中學生就獲得基金會贊助，去咗三藩市Saildrone「小探索船大任務」科技項目，了解合成生物科技，例如以酵母技術生產奶製品，仲親眼睇到含血嘅植物漢堡。黛安聽到都覺得好吸引！而基金會《科技未來》下一站係歐洲，之後會轉往美國東岸。

正如誠哥曾經講過，「謙虛探究問題係獲得更深刻見解和開發更多創新解決方案嘅最佳方法」，誠哥認為香港人擁有充滿創意嘅基因，年輕人應該喺創新科技嘅巨大渦流中，裝備知識，在未來留座。基金會嘅活動讓年輕人直接體會科技改變世界嘅力量，又激發佢哋思考，黛安在此都祝福各位同學仔學成歸來，一齊創造更美好嘅世界。