互動建築藝術展 連接香港洛杉磯

每個地方都有佢獨有嘅建築風格。黛安知道，由香港建築師學會策動嘅「島與半島」建築展覽，由本周四（19日）到下月2日會喺洛杉磯公開展出，而香港希慎廣場9樓藝文空間Urban Sky，噚日就率先展出其中一組互動樂器展品「Skyline Cello」，呢個展品由即日起至10月2日，更會免費開放畀公眾參觀！

創作「島與半島」其中一位新媒體藝術家林欣傑同黛安分享，今次以音樂連接香港與洛杉磯，用城市天際綫作為樂譜，而天際綫睇落似大提琴嘅弦，所以萌起構思「Skyline Cello」。

「島與半島」兩位聯合總策展人蘇國堅建築師同張海活喺揭幕禮時，就話今次展覽長達14日，為香港建築師學會喺洛杉磯舉行嘅首個建築展覽，一共邀請咗香港16個單位以互動展品、文字、動畫等形式，展示14個香港建築方法。

呢個充滿香港建築特色嘅展品，黛安已約好姊妹一齊去睇，你哋都唔好錯過喇。