海洋生物救護及教育中心開幕 海洋公園推動海洋生物保育監察

鯨魚同海龜不時會因為食咗塑膠、魚網，又或者被魚鈎整傷擱淺海邊。黛安聽公關姊妹講，海洋公園入面嘅香港海洋生物救護及教育中心噚日開幕，中心由滙豐150周年慈善計劃撥款近4,000萬資助，係亞洲首間糅合傳統動物解剖同影像解剖設施嘅綜合研究及教育中心，可以全面收集數據，深入分析海洋生物嘅傷亡原因，提供見解分析幫助日後制定監察同保育海洋生物嘅措施。

公關姊妹仲話，中心設施先進完備，有電腦斷層掃描儀器、組織病理實驗室同抹片掃描器，可加強數據處理同分析數量及質量。海洋公園副主席及香港城市大學校董會成員劉鳴煒就話，中心會為海洋生物擱淺個案設置虛擬資料庫，同各地專家分享知識同埋作諮詢用途；亦會安排教育活動、導賞團等畀公眾同學生參與。

黛安知道，中心會舉辦唔同嘅教育活動，例如「香港海洋生物救護及教育中心開放日導賞團」，就會講解保育基金嘅鯨豚擱淺救護行動；仲有為初中學生而設嘅「海洋生物擱淺之謎」，就會透過唔同活動同個案研究，畀學生認識各種檢查方法，及如何調查動物擱淺嘅背後原因。至於「海洋公園工作實錄-動物救援」，就向高中學生介紹先進設備同解剖方法，相信可以令學生哥大開眼界。

另外，海洋公園營業，市務及公共事務執行總監蕭學軍又透露，海洋公園喺7、8月嘅酒店入住率達88%，嚟緊嘅Holleween活動一向深受港人歡迎，估計人流都會同往年差不多。