馬季開鑼日 投注金額$12.88億 創歷來第二高

暑假放咗成兩個月，9月除咗係學生哥嘅新學期開始，對於馬迷嚟講都相當重要，就係新馬季開鑼喇！噚日雖然掛起3號風球，天氣時晴時雨，但仍無阻馬迷對賽馬活動嘅熱愛！馬會話，今季開鑼日投注總額達12.88億港元，超越上季開鑼日紀錄，成為歷來第二高！

新馬季開鑼梗係要皆大歡喜，公關姊姊話噚日入場人士除獲贈新馬季賽事月曆，馬會亦準備咗唔少節目賀一賀；好似喺馬匹正式亮相前，沙圈就率先舉行簡單而隆重嘅開季儀式，由馬會主席周永健率領一眾董事出席，兼主持開鑼醒獅點睛同敲鑼儀式，祝願各位馬迷旗開得勝。

首場賽事就喺噚日下晝1點開跑，現場氣氛仲相當熱鬧，馬迷坐滿看台，打氣聲不絕於耳，黛安都聽到好緊張！最終，第一場賽事由潘頓策騎、沈集成馬房嘅「跑得威」勝出；而韋達升任練馬師後嘅第一擊，結果亦憑第2場貝力斯執韁嘅「明月昇輝」取得一勝，攞到從練以來首捷，值得恭喜！

馬會話，噚日沙田同跑馬地馬場總入場人次為68,271人，比去年74,722人減少8.6%，但仍係過去25年嘅第4高；但總投注額反而升左2.8%，達12.88億，成為歷來第二高！馬會行政總裁應家柏喺賽後就話，投注額升反映賽馬運動仍係香港市民最喜愛嘅娛樂項目。黛安都祝各位馬迷新馬季橫財就手！