新申請續增 中電可再生上網電價計劃 年減130萬棵樹碳排放

要做到低碳生活，黛安認為，要由最基本做起。中電自去年5月推出「可再生能源上網電價」計劃後，各界反應非常好，聽公關姊妹講，截至今年7月底，已接到超過4,300宗申請，當中超過80%已經批出咗。

姊妹又話，每月新接駁嘅可再生能源系統發電容量持續增長，如果成功獲批項目，預計每年嘅總發電量可達6,200萬度電，相等於1.5萬多個家庭一年嘅用電量，每年可以減少約3萬公噸碳排放量，相當於130萬棵樹一年減除嘅二氧化碳量。唔少界別都有參加上網電價計劃，所有獲批項目嘅太陽能板總面積就超過33萬平方米，等於47個標準足球場咁大，令人鼓舞！

其中機場嘅國泰航空飲食服務公司，就喺兩座生產大樓天台上，安裝咗面積達3,000平方米、合共828塊太陽能板，系統會喺下個月底接駁至中電電網，預計每年嘅總發電量可達32萬度電，係目前機場範圍內單一客戶規模最大嘅太陽能發電系統。

黛安知道，黃大仙翠竹花園都加入低碳生活行列，屋苑14幢大廈嘅天台安裝咗近600塊太陽能板，每年總發電量預計約有18萬度電。多間中小學亦有參加，包括何明華會督銀禧中學喺校舍裝設咗144塊太陽能板，畀學生了解綠色能源同可持續發展概念，系統每年可生產近5.7萬度電，校方更將部分上網電價收入，用作環保和STEM教育用途。

中電總裁蔣東強就話，要達致長遠減碳目標，社會各界都要支持同參與，仲話好開心見到上網電價計劃獲唔同客戶支持，未來中電會繼續積極推動本地可再生能源發展，一齊努力令香港有美麗藍天！