屈臣氏善用大數據分析 滿足Z世代顧客喜好

商戶要令生意有增長，首要知道顧客群有咩需要。就好似屈臣氏集團，就從世界各地嘅業務取得數據並進行分析，了解Z世代顧客嘅購物喜好同習慣，難怪生意愈做愈好！

黛安聽屈臣氏集團首席營運總監倪文玲講，1995至2009年間出生嘅Z世代，係零售業嘅未來，佢哋消費力強大，為咗滿足Z世代，數據分析係非常重要。今年，Z世代就成為最大消費群，佔全球77億人口嘅32%，根據屈臣氏集團嘅數據分析顯示，2018年Z世代喺集團旗下品牌嘅消費力就增長咗23%，認真厲害。

經分析發現，平均86%嘅Z世代係美容愛好者，佢哋支出超過70%用喺買彩粧護膚產品，雖然依家係數碼年代，但分析顯示99%嘅Z世代鍾意到實體店shopping，而且鍾意具科技元素嘅實體店，反映Z世代會基於潮流趨勢、產品價格同質素來選購，仲會邊喺店舖選購，邊用手提電話係網上瀏覽其他顧客對產品嘅評價。

姊妹話，屈臣氏集團就有關需求，喺全球舉辦咗連串推廣，包括中國屈臣氏為北京、天津、石家莊同瀋陽嘅大學校園籌辦咗一系列快閃活動同彩粧課程；台灣屈臣氏就開設咗首家Tech Fun玩美概念店，特設StyleMe虛擬試粧鏡、點點購同電子美容顧問等。而歐洲The Perfume Shop推出咗一項全新數碼服務Go in Store，結合AR和AI技術，以先進方式幫客人選購香水。屈臣氏都好關心持續發展議題，今年底會禁止旗下所有零售店售賣嘅彩粧及個人護理產品使用塑膠微粒。