不畏艱辛致力保護莫高窟 「敦煌女兒」樊錦詩獲呂志和獎

黛安覺得，生活真係好需要正能量。噚日「呂志和獎—世界文明獎」就公布咗2019年獲獎名單，表揚喺「持續發展」、「人類福祉」及「正能量」三大目標作出貢獻嘅機構或人士。

公關姊妹話，「持續發展獎」係由國際自然保護組織大自然保護協會獲得；而「人類福祉獎」同「正能量獎」嘅得獎者，分別係研究基因編輯技術嘅珍妮花•杜德納博士（Dr. Jennifer A. Doudna），同從事保育莫高窟工作嘅樊錦詩。三位得獎者會喺10月3日出席頒獎典禮，每位得獎者可獲現金獎2,000萬港元、證書同獎座。

「呂志和獎」獎項推薦委員會主席劉遵義教授話，大自然保護協會一直致力保護土地同水資源，例如四億英畝嘅珊瑚礁和海水，獲得持續發展獎，能肯定組織喺促進地球可持續發展嘅成就。

至於獲人類福祉獎嘅珍妮花•杜德納博士（Dr. Jennifer A. Doudna），就係革命性基因編輯技術CRISPR-Cas9嘅共同發明者，呢個技術可更快、更便宜同精準，喺動植物細胞嘅任何特定位置添加、移除或改變基因物質，可能係治療或預防唔少遺傳病嘅關鍵。

劉教授又介紹，樊錦詩畢生致力保護敦煌莫高窟，要克服資金同當地惡劣環境，佢不畏艱辛嘅精神好值得學習。有「敦煌女兒」之稱嘅樊錦詩就話，獲得「呂志和獎」覺得好榮幸，希望今次獲獎可以鼓勵更多人去重新審視文化遺產嘅重要性。黛安都覺得佢哋嘅工作好有意義，又可以造福人群啊！