發展太陽能電網項目 銀禧中學推廣環保

講起環保，近年大家都好關心再生能源嘅使用。黛安知道，何明華會督銀禧中學參與咗中電嘅「可再生能源上網電價」計劃，校方噚日就舉行咗太陽能發電項目併網發電儀式。聽講學校今次係同匯展科技合作，喺校內安裝咗144塊雙面太陽能板，預計每年有近23萬元上網電價收益，全數將用於發放獎學金、環保同STEM教育用途。

校方同黛安分享，呢個項目係目前全港最大嘅已啟用校園併網太陽能發電項目，成個項目建造成本大約95萬元，預計每年生產嘅電有5.7萬千瓦，即係大概160個4人家庭一個月嘅用電量，項目每年可減低28,500公斤嘅二氧化碳排放，相等於種植1,240棵樹㗎。

校董李銳波話，今次項目建設成本係由佢同太太全數資助，佢仲話未來全部電費收入都會用喺學生身上，包括頒發獎學金同資助有特殊需要嘅同學，令學生有平等學習機會。而何明華會督銀禧中學電腦科主任丘碧瑾就話，會畀同學以太陽能板收集嘅數據學習同分析，例如用大數據分析未來嘅耗電量，初中學生亦會學到太陽能發電原理。校方期望透過呢個項目，進一步帶動同學嘅環保意識，非常有意義啊。