合照打卡完成任務贏大獎 去嘉年華捉Pokémon

各位Pokémon嘅訓練員要留意喇，公關姊妹同黛安講，8月22號至25號喺九龍灣E-Max商場有個Pokémon嘉年華，商場由地下到5樓嘅不同位置，總共有151隻Pokémon等緊大家去捉，而且從未曝光嘅Pokémon劍／盾新御三家「炎兔兒」、「淚眼蜥」同「敲音猴」，仲會聯同Pikachu同Eevee一齊喺商場同大家合照呀！

屆時喺地下中央廣場舉行嘅《Pokémon遊戲嘉年華》Let's Go HK 2019，將有4個唔同主題嘅親子活動，每個活動各有一款Poké Ball印章，大家入場前，記得先到活動接待處填問卷換蓋印收集卡，因為集齊4款Poké Ball印章可以獲得限量版精靈球索袋一個㗎。

公關姊妹仲話，活動當日如果搵齊由大會指定嘅6隻精靈，合照後放上fb或IG，就可以得到限量Pikachu或Eevee立體帽一頂喇，每日最先完成任務嘅151個玩家，更可額外得到由Pokémon Hub送出嘅Pokémon限量禮品一個。

現場除咗有得「捉」精靈，大會更邀請咗日本Pokémon精品專門店Pokémon Hub，喺場內設置期間限定店，大家可以買到多款首賣嘅獨家產品，而會場亦會設置多個精靈寶可夢Let's Go試玩台，可以體驗下捕捉Pokémon同進行對戰嘅樂趣，詳情可留意官方網頁同Pokémon Hub Facebook公布。