279人組裝機械人 活用STEM創健力士紀錄

STEM係今年教育焦點，原來仲可以創造世界紀錄！香港機械人學院噚日專程去到九龍灣展覽貿易中心，舉行「最多人同時製作機械人」健力士活動，黛安聽聞有279個參加者齊齊組裝行得走得嘅機械人，鼓勵小朋友喺玩樂中學習之餘，亦可以挑戰世界紀錄。

黛安仲知道，今次活動每位參與者必須使用指定機械人套件，並最少用15分鐘時間進行組裝，只有完成機械人組裝嘅參與者，先會被列入最終紀錄總數，仲要展示到其走動、避障等功能，真係一啲都唔簡單！

香港機械人學院行政主任劉柏君仲話，今次活動有8至9成參加者都由父母陪同參與，但大會規定家長唔可以「落手」協助，當中不少小朋友仲係第一次用螺絲批，相信呢個活動可以鼓勵佢地「踏出第一步」，同時亦可以訓練佢哋嘅解難能力，可謂一舉多得。