港產發明揚威海外 創新研發勇奪5獎

香港人腦筋轉得快，創新力量都非常突出。黛安聽講生產力促進局上個月首次參加美國矽谷國際發明展，結果憑3項發明勇奪5項大獎，認真威威。

當中由局方研發嘅食品高壓處理系統，可在喺常溫下利用超高壓力殺菌，除咗保證食物可以原汁原味保存，保質期仲可以延長10倍，加上唔使靠低溫防腐，物流成本同能源都慳唔少，難怪喺發明展攞到「評判特別嘉許金獎」、「北京線上發明金獎」同埋「中國發明協會大獎—發明及創新」三個大獎啦。

至於由路政署同局方合力研發嘅智能機械臂系統，亦攞到金獎，呢個發明之前已攞過兩次獎，證明實力非凡。而局方研發嘅智能安全帶都攞到銀獎，呢個發明可全程監察駕駛者狀態，只要發現司機瞌眼瞓就會即刻用語音、閃燈同震動等方式叫醒司機，令行車更安全。

除咗喺外國攞獎，黛安知道局方嘅廚餘全面轉化系統，亦成功喺首屆粵港澳大灣區高價值專利培育布局大賽打入咗最後50強，未來可望將本地廚餘轉化做生物柴油原料、高純度沼氣等有用資源，真係值得讚賞啊！