劉桂芳效力無綫三十年，不論時裝、民初、古裝，但凡劇中有大戶人家，負責斟茶遞水例必由她上場，有相士幫芳姐批命，指佢喺娛樂圈係「晦暗之星」，想當年曾經被封為「廣告女王」，入行竟然要做「晦暗之星」，她一氣之下話要轉行，但相士話佢注定食娛樂圈呢行飯，想轉都轉唔到。
（劉桂芳Facebook）
廣告女王降呢做路人
劉桂芳剛開始加入無綫時係是演啲有分量嘅角色，但唔知幾時開始，漸漸由女配角成為夫人、僕人、師奶、隨從、侍應、甚至路人甲。劉桂芳話主因係佢唔清楚電視台運作，有時候電視台PA（助理編導）搵人做行行企企嘅角色只要冇撞期佢都會答應，PA覺得方便又就手，就冇再搵佢演戲分重嘅角色。
（劉桂芳Facebook）
離巢有更好發展
無綫這份工的確令芳姐從年輕做到老，不過早前無綫將她的合約從正職轉為兼職，佢好樂觀咁話轉兼職後反而多咗演出機會，仲話慶幸終於恢復自由，因為消息傳出後，大陸有好多商演、有拍劇同登台，都向佢招手，仲要有唔少戲分，會有更多過戲癮嘅機會。
（劉桂芳Facebook）
（劉桂芳Facebook）
十一歲打工幫補家計
劉桂芳前半生歷盡艱辛，十一歲小學畢業踏足社會，雖然上有三個哥哥，但媽媽認為女孩唔使讀太多書，早點出來工作可以籌錢打本畀哥哥做生意。劉桂芳話當年好多女仔同佢一樣，小學畢業就出來做工廠妹，晚上再讀夜校進修。
（劉桂芳Facebook）
前夫「自殺式」打動
二十歲時劉桂芳同一位女朋友喺尖沙咀合租一間房，隔籬房係兩個從新加坡到香港打拼嘅男仔，兩人同時對她展開追求。其中一個係無業遊民，佢知道劉桂芳爸爸病咗，就去觀塘孭佢爸爸看病，又喺醫院服侍佢爸爸，又因為劉桂芳不接受佢嘅追求而要生要死，結果佢同前夫結咗婚仲去新加坡定居。
有眼無珠嫁錯郎
相士曾批劉桂芳係「一朵有很多蝴蝶圍繞的花」，但蝴蝶唔會為花停留。劉桂芳唔信命，搵一個為佢自殺嘅老公，覺得佢肯為自己死，應該唔會辜負自己，婚後好快生咗一個女，三年抱兩，阿仔仲喺在肚裏面，老公回來話有另一個女人，叫佢讓半邊牀出嚟，要將外面嘅女人接返嚟一齊住。劉桂芳苦苦哀求，叫佢念在肚裏面嘅BB，唔好拆散頭家，但佢仍堅持要一齊住，劉桂芳惟有帶住仔女離開。
劉桂芳（左）不時同其他演員Gathering~（劉桂芳Facebook）
苦盡甘來
芳姐婚姻失敗，帶着年幼女兒，抱着出世冇耐嘅囝囝返香港，只要有工作就去做，雖然遇人不淑，但老爺對佢好好，堅持供兩個孫去外國留學，依家阿女喺三藩市做室內設計，阿仔喺醫學實驗公司任職，被公司派到柬埔寨，仲喺當地娶妻生子，她唔使再為下一代操心。
孫仔好Cute！（劉桂芳Facebook）
弄孫為樂～（劉桂芳Facebook）