2016年4月1日，亞洲電視「熄機」，結束近60年電視廣播歲月。出身亞視嘅張啟樂（Ben），算是賺了一點人氣，同其他亞視藝員唔同，佢並冇投向無綫嘅懷抱。2018年初張啟樂開始「叫賣哥」生涯，自設「吃喝玩Vlog」平台，與不同商戶合作，於網上直播拍賣。由藝員變身「叫賣哥」，Ben自言自己唔是推銷員，只係換咗個表演平台。
（張啟樂Facebook）
三年前，張啟樂喺Facebook見到不少台灣「叫賣哥」、「叫賣妹」身影，佢發現原來香港一直冇同類型嘅行銷手法，因而萌生將「叫賣哥」帶到本地嘅念頭。
（張啟樂Facebook）
網上「叫賣」玩法好簡單，觀眾直播期間若對貨品有興趣，只要在限時內留言落單，轉帳付款後店舖就會將貨品送到家中，而主持會視乎貨品受歡迎程度，即時調整貨品售價，最終「定價」一般會較市價便宜，以吸引人氣。一個全新專頁由初期只有約200人，至今已有超過10,000人追蹤，最高更有9萬多人次於直播後翻睇影片。
（張啟樂Facebook）
險爆「公關災難」
張啟樂坦言尋找客戶有困難，要精挑細選。事關佢曾經幫過一間生果店做直播，銷售非常好，但對方店員竟然冇預先留貨。最後要向其他公司買貨畀觀眾，拎不到嘅惟有退訂。有驚無險，所得佣金仍有5位數。
（張啟樂Facebook）
張啟樂依家學精咗，會預先要求對方留貨，亦要注意人手夠唔夠，物流亦要夠好。佢為咗爭取客戶信任同了解，仍會幫手處理部分訂單。
（張啟樂Facebook）
自小立志成為演員嘅Ben，拍過無數電視、電影作品。過去20年在娛樂圈浮浮沉沉，Ben覺得自己出生於錯誤年代：「我早十年出生，就可以經歷娛樂圈最豐盛年代；我遲十年出生，就經歷互聯網最豐富嘅年代，但依家卡喺中間，唔上唔落。」
張啟樂（左）與黃浩然（張啟樂Facebook）
視《賣嘢王》為表演平台
身邊好友如姜皓文，獲金像獎「最佳男配角」；過檔無綫的陳展鵬、陳煒、黃浩然等亦「劇接劇」；甚至六合彩之子蔡國威，曝光率亦比以前多。大家出身相若，難免會被人比較：「但我反而會咁諗，若果我真係加入無綫，我係咪有機會做到《賣嘢王》呢？，我從來都不是打算做生意，我是想用另一個平台去表現給人看。」
左起：姜皓文、張啟樂與惠英紅（張啟樂Facebook）
張啟樂（左）與姜皓文（張啟樂Facebook）