首間特殊學校兼宿舍 匡智會營辦 明年9月啟用

近年社會愈來愈關注有特殊需要嘅兒童，黛安聽公關姊妹講，匡智會就嚟喺東涌營辦全港第一間，為輕、中和嚴重智障程度學童而設嘅特殊學校和宿舍，預計會喺今年第三季落成，明年9月正式啟用！

匡智會屬下13所特殊學校，早前就舉行咗聯校畢業典禮，由教育局首席教育主任（特殊教育）劉穎賢博士擔任主禮嘉賓，佢好感謝匡智會和屬校多年來為有特殊學習需要嘅學生提供適切嘅教育服務，近年仲積極推動STEM教育，並獲得香港賽馬會慈善信託基金撥款，喺未來1年為13間匡智會屬校安裝太陽能光伏系統，畀學生享受STEM教育嘅樂趣。

匡智會副主席暨教育執行委員會主席張偉就話，匡智會一直致力為學生開拓更好嘅學習環境，教與學都要與時並進，為咗推動自閉症學童嘅全人發展，學校教育心理學家積極試行「溝通×關係×適應︰殷盛蛻變（介入模式）」，加強同低口語能力自閉症學童嘅關係和溝通。