近日魏駿傑出席公開活動「驚為天人」，昔日型到冇譜嘅佢中年發福大走樣，仲被指似范徐麗泰，可以話係慘不忍睹。魏駿傑毀咗睇《陀槍師姐》一代人嘅回憶，反觀當年同佢因為拍《陀槍師姐》撻着嘅滕麗名，冇乜走樣之餘仲愈來愈有女人味，係Keep同冇Keep嘅一個活體實證。
唔講可能唔記得，魏駿傑當年同滕麗名拍拖之前，仲有一個拍咗3年幾拖嘅圈中女友何婉盈，近日佢都出席咗一個公開活動，同樣地驚為天人，不過佢係驚為天人地仙氣，好似食咗防腐劑咁，唔識得老。
何婉盈1991年喺大學修讀咗一個學期就返香港報名參加香港小姐競選，躋身前5名但未能取得三甲席位。
同屆個個都索到啪啪聲。
落選後何婉盈簽約無線電視，獲重點栽培。1992年，正式初試啼聲推出與曾航生合唱經典歌曲《再見亦是朋友》，之後即人氣急升並廣為觀眾注意，同年推出首張個人唱片專輯《Elaine》，更獲無線電視賞識安排拍劇。
曾航生與何婉盈
1993年 何婉盈嘅唱片主打歌曲《愛上你是我一生的錯》喺卡拉OK成為大熱作品。但後來何婉盈選擇專注拍劇，喺多部劇集中飾演第二女主角或女配角，較為人熟悉的有《清宮氣數錄》、《隋唐群英會》等。
不過後期何婉盈嘅發展未盡如意。1996年，何婉盈選擇退出娛樂圈重返校園，繼續她未完成的大學畢業夢想，1999年終於大學畢業。
畢業後投身公關行業，於香港賽馬會擔任顧客服務經理，亦曾任馬會電視節目《馬上全接觸》主持人。之後又離開公關工作，轉到證券行擔任投資工作至今。
何婉盈父親都係愛狗人士。
何婉盈三十歲前都係衣食無憂，第一次發現要為錢煩惱，係父親患癌臨終前。當年爸爸病重，醫病三、 四年，經濟開始拮据。當時嘅佢已經喺馬會工作，月入三萬多元，交租已佔了一半，加上她那時養了五隻狗，開支很大。由三十歲後十年左右，佢都要身兼馬會公關、歌手同司儀三職，先勉強喺經濟上「搞得掂」。
2001年何婉盈嫁畀商人傅大全，但婚姻只維持了一年多。何婉盈話當時覺得自己就快三十歲，有人肯同佢結婚就結，加上病父好想見到佢結婚，所以就結咗。
與前夫分開原因
何婉盈前夫家庭環境好，婚後發現對方成日唔使返工，當佢起身去馬會返工時，前夫仲瞓緊，佢覺得同對方原來唔同步，前夫冇大家一齊努力嘅概念，漸漸生活各有各走。何婉盈話會將佢所有人生錯誤重複同囡囡講一次，唔好為結婚而結婚。
與男友意外懷孕
回復單身後何婉盈遇上囡囡嘅生父，雖然最後都冇一齊，但二人仍保持好朋友關係。何婉盈三十五、 六歲時，意外懷孕，但佢當時同男友嘅關係唔太穩定。生咗囡囡最初兩年幾，佢同男友同居，但選擇唔結婚，結果同居關係只維持兩年，生活習慣同理念唔同，大家努力過，但始終維持不到。
趁女兒兩歲決定分開
何婉盈話自己自細喺單親家庭長大，父母在我九歲時離婚，我很清楚當時自己的感受，所以囡囡兩歲時，佢知道要趁早同男友分開，唔係就要等到囡囡至少十六或十八歲。
如果可以從頭選擇，何婉盈話寧願採取更小心嘅避孕措施，都唔會生一個小孩令佢要喺單親家庭中長大，因為佢自己成長時冇完整家庭。
將最好嘅嘢畀囡囡
何婉盈依家一樣堅持帶女兒「上山下海」：「行山、打波、游水、出海、去魚排、去沙灘、踏單車，我咩都同阿女做齊，星期日我務求佢唔好喺屋企望住電視，我都唔會安排佢上興趣班，星期日係我哋兩母女嘅時間，而且一定要遠離城市。依家我經濟好啲，成日帶佢出埠去旅行。我知道自己畀咗佢一個遺憾（於單親家庭長大），所以我好着緊佢嘅成長心理。」認識佢囡囡嘅都話，以單親小朋友嚟講，佢係一個Happy girl。為了讓囡囡有個快樂童年，佢仲安排囡囡讀國際學校。
對感情「認命」
47歲嘅何婉盈經歷過『一點五』段婚姻失敗，佢話發覺自己嘅問題係易放棄，忍受唔到未來五十年要對着一個「睇唔過眼」嘅男人。佢仲話時辰八字係扭轉不到，自己命中注定唔會有一段圓滿婚姻。
嚟緊9月，佢將會同黃翊，仲有一班「消失的歌手」開演唱會，其實單身都可以好精彩。