劇集《BB來了》去年7月播映,大受觀眾歡迎,劇情講一對新手父母面對生育和照顧小朋友,話題夠晒貼地,而且男女主角黎諾懿和李佳芯演繹得非常出色,劇集入面出現過的7位「允豬」BB又好可愛,加上盧宛茵飾演的奶奶尖酸刻薄,入形入格,所以劇集叫好又叫座,口碑同收視都不錯。
黎諾懿同李佳芯拍攝《BB來了》續集。(圖片:李佳芯IG)
盧宛茵在劇集飾演惡奶奶,大獲好評。(圖片:《BB來了》電視截圖)
琴日演員羅樂林接受訪問時透露10月將會開拍《BB來了》續集,他表示原來71歲的他打算70歲後不再「疊劇」,意思是不想同一時間接拍兩部劇集,因為體力未必可以負荷到,羅樂林話:「不過冇辦法,我劇入面演李佳芯個爸爸,既然拍續集就要拍啦,到時候希望《BB》同《愛回家之開心速遞》兩邊都可以平衡到時間。」這個消息對不少觀眾來講都非常興奮,本報致電黎諾懿,他說:「剛剛都收到這個消息,不過未正式通知,我都未知劇本故事如何,不過既然講得係《BB來了》續集,當然想係原班人馬啦,而且希望繼續用同一個允豬,咁樣大家會睇得有親切感。」提到去年的「允豬」由7個不同階段的BB分別演繹,7個之中到底會揀邊個?諾懿話:「真係未知,我個個都鍾意,不過要視乎返佢哋大個女之後變成點,會唔會認人、易唔易控制等等,因為呢班允豬應該面對緊Trouble 2 嘅情況,相信要拍劇都唔容易。」
《BB來了》演出過的允豬有7個。(圖片:李佳芯IG)
諾懿曾經帶囝囝小春雞去見「允豬」妃頤。(圖片:黎諾懿IG)
拍攝《BB來了》時,黎諾懿經常被問會否帶「小春雞」客串演出,他當時笑稱因為小春雞較「允豬」角色大,所以不合用,問到今次續集會否可以挑戰?他說:「拍劇真係唔得,前幾日我先帶小春雞做個訪問,我全程都冇辦法專心,語無倫次,因為同佢一齊,好怕佢走來走去整親,所有專注力都放佢身上,所以拍劇會好影響到我,不會帶住個仔拍。」
黎諾懿話帶住小春雞好難集中精神工作,所以不會叫囝囝客串演出。(圖片:黎諾懿IG)
《BB來了》去年7月播出,拍攝期間「允豬」由0歲到1歲,至今的話應該大約2歲,其實部分「允豬」小演員都有Instagram戶口,當中包括巧媛、妃頤、TASI和芯語,吸引不少人追蹤,見證住她們的成長,由BB到依家識行識走,轉變真大,唔知到時候邊個允豬會成功「入屋」拍攝《BB來了》續集呢?
圖中的叫芯語,佢都演過「允豬」呀!(網上圖片)
Tasi早前被佳芯同黎諾懿講過,她是一個不怕生的小女孩,似乎好適合再拍續集。(網上圖片)
妃頤不時會跟黎諾懿見面。(網上圖片)
最後這個妹妹叫做巧媛,臉頰圓圓好可愛啊!