呢排一打開Instagram、Facebook都見到大家係咁玩Snatchat變小朋友嘅filter，真係好似返咗去以前細細個咁，好鬼得意。不過睇嚟睇去其實有啲悶，話晒個filter有美肌過，同埋大部分只係將大家個臉型整圓啲、短啲，隻眼放大啲就話變咗小朋友，好多人因為天生童顏，個樣同原本差唔多，冇乜點變。變小朋友唔好睇，咁如果變古人呢？唔少藝人原來同古代人成個餅印咁，相似程度仲令人一度懷疑係改圖，究竟係人有相似、前世今生，定係佢哋識得穿越時空呢？
小儀 VS 李滿
李滿係台灣男人張東華嘅老婆，張東華係一名商人，同3個兄弟喺1903年成立咗「張東隆商行」，販賣石油、燃料、砂糖和進口汽車等，喺日治時間盛極一時。就咁睇真係以為小儀將自己啲相轉咗做黑白色，唔易察覺係第二個人！
羅嘉良 vs 賀瑞麟
賀瑞麟生於江蘇銅山，係一名共產黨黨員，曾出任共青團南京市委書記。不過1928年佢就被國民黨殺害，終年19歲，而羅嘉良就喺1962年出世，唔通係賀瑞麟投胎轉世變成羅嘉良？
范冰冰 vs 楊綠潤
楊綠潤係美國華納公司嘅一位電影演員，生於1913年，因為同范冰冰好似樣，甚至有人叫佢做「前世范冰冰」。
歐陽震華 vs 瑾妃
呢個真係好正，估唔到歐陽震華竟然會同光緒皇帝嘅妃子咁似樣，身形仲要差唔多！搵番歐陽震華喺劇集《施公奇案II》嘅造型，個神情根本一模一樣，母子咁款。
譚詠麟 vs 方伯謙
原來譚伯同北洋海軍副將方伯謙幾似，拎埋佢當年扮黃飛鴻嘅造型對比真係差唔多，唔怪之得譚伯都忍唔住話︰「這樣真令自己懷疑有沒有參加過中日甲午戰爭！」
魯振順 vs 巴金
巴金係現代文學家、出版家、翻譯家，同時也被譽為係五四新文化運動以嚟最有影響力嘅作家之一，20世紀中國當代文壇巨匠。魯振順可以同佢咁似樣，唔知佢文筆好唔好呢？
古巨基 vs 孫中山
國父孫中山同基仔梗係唔擺唔得啦，似樣似到大家都信佢哋有前世今生關係！其實都幾夾，一個喺滿清年代已經去過外國留學，之後成為近代英雄；一個係香港天王級男歌手，兼任導演、廣告導演、演員、設計師、企業家、主持，兩個都係才子嚟㗎。
趙雅芝 vs 蔣英
中國導彈之父錢學森夫人蔣英就同趙雅芝好似樣，兩個都係大美女，前者都需要喺幕前出鏡，係個女聲樂教育家、女高音歌唱家，好厲害㗎。
劉德華 vs 墨子
劉德華同2000幾年前中國偉大思想家墨子非常相似，兩個側臉都好有英氣，所以嗰陣搵華仔喺《墨攻》扮墨家俠客革離絕對係個英明嘅決定。
石修 vs 馬步芳
石修同民國時期西北地區嘅軍閥馬家軍馬步芳嘅臉型、鼻都幾似！如果石修留鬚嘅話應該會再似啲。
大S vs 吳莉莉
神情與大S好似嘅係「延安第一平民美女」吳莉莉，佢爸爸係清末民初鹽務官員，家境良好，上世紀30年代初就考入北京師範大學外語系，後來更以優異的成績畢業，到美國留學。最後吳莉莉喺革命時期嘅延安做翻譯，係一名才貌雙全嘅女子。
林盛斌 vs 陳璧君
雖然阿Bob林盛斌同王精衛妻子陳璧君喺外形上唔多似，但因為兩個人都係圓框眼鏡、臉圓圓，所以佢哋望落都幾似。
周柏豪 vs 周恩來
一睇到總理周恩來嘅chok爆舊照，唔少人就即刻聯想到周柏豪，果然拼上去真係冇9成都有8成似，特別係嗰個好有戲嘅咀同埋迷人嘅眼神。