大英博物館100藏品來港 看人類發展史

香港作為國際大都會，成日都有唔少國際級節目，文化展覽當然唔少得！黛安知道，香港文化博物館即日起至9月9日期間，會舉辦「百物看世界——大英博物館藏品展」，展出100組精選自大英博物館嘅珍貴藏品，每樣都代表住人類唔同嘅發展歷史，好似人類最早嘅石器工具、見證最早城邦出現嘅伊拉克烏爾軍旗、反映奴隸販賣嘅50枚「馬尼拉」貨幣等，睇完絕對有收穫！

黛安知道，今次展覽係文化博物館本年度嘅重點展覽之一，當中構思仲係源自大英博物館同英國廣播公司一個廣受歡迎嘅廣播節目，以大英博物館藏嘅100組藏品，訴說橫跨200萬年嘅人類故事，從每件物品背後嘅故事，帶領觀眾遊歷一次世界獵奇之旅！

為配合展覽，博物館亦特設教育專區，加入一個以香港百件文物為題嘅展覽，兼推出一系列教育節目，好似專題講座、展覽導賞等，記住唔好錯過喇！