平時老奉請飲茶 一次唔請即被鬧 港男嬲爆：有一種親戚叫無恥

大家與親戚飲茶聚會時，通常會是「AA制」，還是會輪流請食飯？一名男網民昨日在網上討論區「連登」發文抱怨，指自己有一班「無恥親戚」，每次飲茶都例必「鬥拖」不付錢，等他出手「埋單」。日前母親節，他與該班親戚再次飲茶，刻意未有主動埋單。未料，親戚竟當場高呼「你未畀錢呀」，晚上更致電斥責他沒有禮貌、不懂人情世故，並要求他夾錢。對此，他感到十分無奈，直言：「為咗幾百元做到咁醜！」

親戚鬥坐等人埋單

樓主以「有一種親戚叫無恥」為題發帖，指自己20多歲，出來社會工作了數年，「有一班親戚次次出嚟飲茶都唔畀錢，年齡大概40至60，啲仔女係廢青，拍拍屁股就走咗。」由於與他們飲茶時經常無人埋單，「咁我呀媽就叫我畀，廢事咁尷尬大家鬥拖咁。畀完之後都大家都唔會講主動夾返錢，我都算啦，幾百元平時食都食咗。」

已曾請過至少8次飲茶

至日前母親節，他與該班親戚再次飲茶，由於心諗「之前都畀咗大大話話8、9次，今次試下唔好畀」，至埋單時便先自行離去。未料此時，一名親戚當眾高呼「你未畀錢呀」，「個意思係叫我請晒，唔係夾錢。立刻好興(㷫)，老奉咩而家！所以扮聽唔到走咗。」未料當晚，該名親戚竟致電他斥責一番，「你今日做咩唔畀錢走咗，知唔知好無禮貌」、「我唔理呀你要夾返錢，你有份食」、「你咁大個人應該要知呢啲人情世故」、「你知唔知呀，我教醒你咋！」

樓主被親戚罵感不滿

樓主對此感到十分不滿，無奈地在帖中稱：「其實張單唔使1000蚊，之前你哋都無主動話夾，我又打畀你話你無夾咩？為咗幾百元做到咁醜！」他留言進一步指出，由於親戚在他幼時曾照顧過他，因此會不時飲茶聚會，「諗住孝敬老人家，大個諗住請返佢哋，點知次次變左老奉。」他又在文中表示，點讚的話等於支持「老死不相往來」，結果引來近1萬人「畀Like」。

網民：無好過有啦呢啲親戚

此事引來網民熱議，不少人紛認為樓主應作出反擊，又建議他不要再出席此等聚會，「最多咪以後唔見，無好過有啦呢啲親戚」、「呢啲人親戚又好朋友又好，識少個都唔係壞事」、「咁唔該上9餐位位夾返$2000先」、「母親節後輩請就合理嘅，但應該大大聲叫晒其他後生仔女一齊夾，再加多句之前咁多餐都係我畀，係時候一齊孝敬下啲老人家啦」。

樓主：決定以後老死不相往來

另有網民分享類似經歷，「次次大時大節成班親戚飲茶，成廿幾個人，食飽就坐喺度吹水，有一半人無擺低錢就話要走先。我開頭都畀過幾次錢，但無人夾返畀我。而家同佢地一齊坐，鬥唔俾錢。」樓主看畢網民留言後，表示與父母已決定以後與該班親戚老死不相往來，「我好嬲，以後老死不相往來，多謝各位支持。」