「新鄰居」咕姑固晾衫架築巢 暖男屋主憂唔穩陣幫手加固

上月曾發生一對班鳩在冷氣機旁築巢被人以棒驅趕，致2隻蛋慘被掃落街跌碎的事件，但其實香港仍有不少人願意善待雀鳥。一名男網民昨晚在Facebook群組「巴打絲打 Facebook Club」發文求教，指有兩隻斑鳩在其已棄用的晾衫架上築巢，但不甚「穩陣」，加上即將落大雨，因此想出手幫忙加固，希望其他網民可以給予意見。對此，有鳥雀專家接受《晴報》訪問時指，斑鳩選擇在該處築巢自有牠們的原因及分寸，因此樓主不用太擔心。

{{hket:inline-image name="bird300420194.jpg"}}{{/hket:inline-image}}

樓主分享照片顯示，只見一隻斑鳩正安坐巢上，另一隻斑鳩則站在晾衫架上；鳥巢由樹枝搭成，看上去頗為細小及簡陋。樓主在帖中表示：「最近多左2個新鄰居，想幫佢地整大啲間屋，佢間屋好似唔多穩陣，又驚落大雨，大家有咩計？」由於斑鳩在晾衫架的邊緣築巢，距離太遠下，樓主難以安裝擋雨板為牠們遮風擋雨，因此感到憂心。

此事引來網民熱議，不少人大讚樓主有愛心，「你好好人，好有愛心！」、「你都幾有愛心，不過要買定耳塞瞓！」、「謝謝樓主，祝🐦🐦平安咕姑固～」此外，亦有不少網民提供各種意見，「幫佢執好個底層，聽日開始會落雨呀」、「放個細紙皮盒上面放乾草及樹枝，牠未必會入住但有可能加建牠自己的」、「整個遮頂畀佢好啲～或者用索帶下面再整個膠托好啲，我怕佢啲蛋跌落街」。有網民更分享自身經驗，指有一對斑鳩已持續4年到其家生蛋，「我屋企果對出世了，每年4月都會返黎，所以整靚個兜比佢用。」

{{hket:inline-image name="bird300420191.jpg"}}{{/hket:inline-image}}

{{hket:inline-image name="bird300420192.jpg"}}{{/hket:inline-image}}

不過，亦有網民認為樓主不應以外力干擾牠們，「牠們有牠的生存方式，唔好搞佢地就是最大的幫忙，否則越幫越忙」、「佢地揀得就係佢地覺得OK，大自然順其自然啦」。此外，亦有網民認為，樓主應照顧樓下住戶的應受，「樓下晾衫果啲多得你唔少，成日中雀屎」、「同樓下講聲，我怕樓下多雀屎」。有網民更表示：「個人經驗：早排本着慈悲之心無趕走樓上白鴿，鴿糞跌落我窗都忍佢，最慘係有禽蹣(蟎)入屋，勁咬全家人，樓主請盡快搬走鴿巢！」

對此，觀鳥會高級保育主任胡明川接受本報訪問時表示，相中雀鳥為珠頸斑鳩，認為樓主不用太擔心，「唔使做啲乜嘢，唔好以人類嘅角度去睇。揀呢個地方自有佢哋嘅原因，自己會有方法去令個巢穩陣，自己識修補。如果貿貿然去搞，反而可能令個力轉一轉，影響個巢結構，好心做壞事。」

她又指出，如果怕鳥糞影響樓下住戶，樓主可以固定好膠板或箱等來托底，再定期清理，以保持衞生。最後，她表示，斑鳩雖然會「咕姑固」叫個不停，但牠們生完蛋便會走，希望大家在雀鳥繁殖期多點包容，「只係用一用個巢，大自然就係咁，唔好因為咁而去搞佢、干擾佢。」